«Յալթա 2.0» չի լինի․ Իրանը «գլոբալ գորշ գոտուց» դուրս կգա՞. Վահրամ Աթանեսյանի անդրադարձը

«Յալթա 2.0» չի լինի․ Իրանը «գլոբալ գորշ գոտուց» դուրս կգա՞. Վահրամ Աթանեսյանի անդրադարձը

«Մենք չենք գտնվում երրորդ համաշխարհային պատերազմի մեջ, և սա «Յալթա 2.0» չէ․ ռազմավարական շահերի գոտիների բաժանումը՝ Արևմտյան կիսագունդը՝ ԱՄՆ-ի համար, Եվրոպան՝ Ռուսաստանի, Հարավչինական և Արևելաչինական ծովերը՝ Չինաստանի, տեղի չի ունենում։ Մենք գտնվում ենք ռազմավարական մրցակցության սկզբում, ոչ թե վերջում»,– Շենժենում Թրամփ-Պուտին-Սի Ծինփին գագաթնաժողովի նախօրեին X-ում գրել է բուլղարացի հայտնի աշխարհաքաղաքագետ Վելինա Չակարովան։

Ըստ վերլուծաբանի՝ իրավիճակը համեմատելի չէ, քանի որ միջին տերությունները, առաջին հերթին՝ Հնդկաստանը, կամուրջ են հանդիսանում երկու համակարգերի միջև և անվտանգության առումով համագործակցում են ԱՄՆ-ի, իսկ տնտեսական առումով՝ Չինաստանի հետ և ապահովագրվում են կամ հավասարակշռում են, քանի որ չեն ցանկանում հայտնվել նոր երկբևեռ աշխարհում։ ԱՄՆ-ի և Ռուսաստան-Չինաստան տանդեմի մրցակցությունը նա անվանում է «գլոբալ գորշ գոտիների համար նոր սառը պատերազմ» և ընդգծում, որ Իրանը «ամենասուր հարցն է», քանի որ Պարսից ծոցում կրիտիկական ենթակառուցվածքների ոչնչացումը և Հորմուզի նեղուցի փակումը «գլոբալ ճգնաժամ են հրահրել»։

Չակարովան գրեթե համոզված է, որ Իրանի «պատերազմը կարող է վերաբռնկվել մի քանի շաբաթվա ընթացքում»։ Այս ֆոնին Բաքվի իշխանական haqqin.az-ը TRIPP նախագծի շուրջ հրապարակում է արել: Բավական ծավալուն նյութը կառուցված է իրանական մամուլից քաղվածքների վրա։ Դրանցում առանձնանում է Եվրասիայի հարցերով իրանցի փորձագետ Ահմադ Քազեմիի գնահատականը, ըստ որի՝ «Թրամփի ուղին» երկրորդ Հորմուզի նեղուց է։ Փորձագետը գնահատել է, որ այդ ուղին կարելի է օգտագործել Իրանի հյուսիսից էներգակիրների տարանցման նպատակով, բայց ԱՄՆ-ն ձգտում է այն Թեհրանի ազդեցությունից դուրս թողնել։ Չինաստան մեկնելու նախօրեին ԱՄՆ նախագահ Դոնալդ Թրամփը լրագրողներին ասել է, որ Իրանի հարցը քննարկելու է Ռուսաստանի և Չինաստանի առաջնորդների հետ։ Նա, սակայն, հավելել է, որ ԱՄՆ-ն «լավ վիճակում է»՝ ակնհայտորեն հասկացնելով, որ Պուտինի և Սի Ծինփինի օգնության կարիքը չի զգում։

Նոյեմբերի 17-ին ԱՄՆ օդուժը Պարսից ծոցի իրանական Քեշմ կղզին հարձակման է ենթարկել։ Պենտագոնը հայտարարել է, որ դիմել է ինքնապաշտպանության։

Նույն օրը Ուկրաինան խոցել է Ղրիմի կամուրջը, որի հետևանքով թերակղզու հետ Կրասնոդարի երկրամասից ավտոմոբիլային հաղորդակցությունը խզվել է։ Փորձագիտական կայուն տպավորություն կա, որ ուկրաինական «հանդուգն և գերճշգրիտ գործողությունը չի կարող չազդել Թրամփ-Պուտին բանակցությունների վրա»։

Վահրամ Աթանեսյան

Դիտումներ

logo

Official broadcaster of the Eurovision Song Contest

Eurovision

Ներբեռնեք հավելվածը

qr
App StoreGoogle Play
FacebookXInstagramYouTubeLinkedIn

©2026 1tv.am

Նախագծվել է՝ MATEMAT-ում