ԱՄՆ-ն մշակել է Իրանի էներգետիկ ենթակառուցվածքներին և միջուկային օբյեկտներին հարվածելու ծրագրեր՝ օգտագործելով իր զինանոցում առկա ամենահզոր ոչ միջուկային ավիառումբերը, հաղորդում է CNN-ը՝ հղում անելով ԱՄՆ պաշտոնյաներին։
Նրանց խոսքով՝ ԱՄՆ-ն քննարկում է GBU-43/B ռումբն Իրանի դեմ կիրառելու հնարավորությունը, եթե Թրամփը հրաման տա վերսկսել ռազմական գործողությունները միջանկյալ ընտրությունից առաջ կամ հետո։
Պաշտոնյաները կարծում են, որ GBU-43/B մեծ հզորությամբ ռումբի օգտագործումը կարող է հանգեցնել ներկայիս հակամարտության զգալի էսկալացիային այն ժամանակ, երբ ակտիվ ռազմական գործողությունները նվազել են։
Ռազմական ծրագրերի քննարկման ընթացքին ծանոթ աղբյուրները CNN-ին հայտնել են, որ ռումբի օգտագործումը, հավանաբար, չի օգնի ԱՄՆ-ին հասնել իր ռազմավարական նպատակներին, այդ թվում՝ Իրանի միջուկային կարողությունների ոչնչացմանը։
Նրանց խոսքով՝ չնայած այդ ռումբը կարող է ոչնչացնել ինը քաղաքային թաղամասին համարժեք տարածք, այն չունի բավարար թափանցելիություն, որպեսզի ոչնչացնի այնպիսի թիրախներ, ինչպիսիք են Պիկաքս լեռան տարածքում գտնվողները, որոնք ենթադրաբար պաշտպանված են գրանիտի հաստ շերտերով:
Աղբյուրները նշում են, որ GBU-43/B-ի օգտագործումը կարող է ավերիչ հետևանքներ ունենալ հարվածի գոտում, բայց, ամենայն հավանականությամբ՝ միայն մակերեսային։ Բացի այդ, ռումբի պայթյունի հետևանքով զոհեր կլինեն քաղաքացիական բնակչության շրջանում, հատկապես եթե թիրախավորվեն բնակեցված տարածքների կամ քաղաքացիական օբյեկտների մոտ գտնվող իրանական ենթակառուցվածքները։
Այնուամենայնիվ, ըստ աղբյուրների, Թրամփը կարող է որոշել օգտագործել ռումբը որպես հոգեբանական զենք այն իրավիճակում, երբ իրանական ռեժիմը կոշտ դիրքորոշում է ընդունում և պատրաստ չէ զիջել դիվանագիտական պահանջներին։
