Բրյուսելում շուրջ 30 հազար մարդ դուրս է եկել բողոքի ցույցի՝ ընդդեմ բյուջետային ծախսերը կրճատելու կառավարության ծրագրերի: Արհմիությունների կազմակերպած ակցիաներն ուղղված են միջոցների խիստ խնայողության դեմ, որը, մասնակիցների կարծիքով, կհանգեցնի կենսամակարդակի նվազմանը, առողջապահական ծախսերի կրճատմանը և հարկային բեռի աճին: Նրանց միացել են նաև այն ուսանողները, որոնք դեմ են կրթության ֆինանսավորման կրճատմանը և ուսման վարձի բարձրացմանը:
Լրատվամիջոցները գրում են, որ ցույցերը ոգեշնչված են այս շաբաթ Ֆրանսիայում տեղի ունեցած ցույցերից: Հարևան երկրում, այդ թվում՝ մայրաքաղաք Փարիզում, բողոքի ակցիաները շարունակվում են արդեն երկու շաբաթ։ Աշակերտներն ու ուսանողներն ընդվզում են ծանրաբեռնված դասացուցակների, ուսուցիչների պակասի և կրթության ոլորտում առկա այլ խնդիրների պատճառով:
Որոշ ակցիաներ ուղեկցվում են անկարգություններով և բախումներով: Ձերբակալվել է ավելի քան 6600 մարդ, որոնց մեծ մասն անչափահասներ են։ Դպրոցականների ակցիաներին միացել են նաև մանկավարժներն ու ծնողները։
