ԵԱՏՄ-ի ու Եվրամիության միջև ընտրություն, ռուսական ռազմաբազայի ճակատագիր, հայկական երկաթուղիների կոնցեսիոն կառավարում, ատոմակայան, գազի գին. սրանք այն հարցերն են, որոնք, ըստ փորձագետների, շատ մեծ հավանականությամբ կլինեն Հայաստանի վարչապետի՝ դեկտեմբերին Մոսկվա սպասվող այցի օրակարգում և Պուտինի հետ քննարկումների սեղանին:
Մասնագետները չեն բացառում, որ հատկապես ԵԱՏՄ-ի թեման ռուսական կողմը փորձի որպես լծակ օգտագործել՝ մյուս թեմաներով իրավիճակն իր օգտին շեղելու համար:
Հայաստանն իր հերթին կփորձի հասնել տեղական ապրանքների նկատմամբ սահմանափակումների վերացմանը, հակառակ դեպքում ցույց կտա, որ անիմաստ է դառնում ԵԱՏՄ-ին անդամակցությունը:
Կշարունակվի՞ երկու երկրների հարաբերություններում ճգնաժամը, թե՞ ոչ. կարծիքներ կան, որ կողմերը կփորձեն չգնալ իրավիճակի սրման: Հայաստանը ցույց կտա, որ պատրաստ է հարգել Ռուսաստանի շահերը, սակայն Հայաստանի շահերը ևս պետք է հարգվեն, հակառակ դեպքում դա կբերի Ռուսաստանի դեմ լարվածության մեծացման:
Փորձագետները հիշեցնում են՝ լարվածությունը ստեղծեց Ռուսաստանը ընտրություններից առաջ՝ ընտրությունների վրա ազդելու համար, մինչդեռ հիմա նույն Ռուսաստանը կփորձի ինչ-որ ձևով լեզու գտնել գործող իշխանությունների հետ, սովորել աշխատել այնպիսի Հայաստանի հետ, որը կարող է չվախենալ և անհամաձայնություն ունենալու դեպքում արձագանքել։
Հեղինակ՝ Մերի Խաչատրյան












