Երկուշաբթի ռուս պաշտոնյաները փորձել են փարատել հանրության վախերը, որոնք առաջացել են Սիբիրում ժանտախտից լաբորանտի մահվան մասին հաղորդագրություններից հետո: Նրանք ընդգծել են, որ իրավիճակը վերահսկվում է, և հիվանդի հետմահու թեստերում չեն հայտնաբերվել հիվանդության հետքեր:
Իրկուտսկի նահանգապետը պնդել է, որ լաբորանտուհու մահվան պատճառը եղել է «անորոշ պատճառաբանությամբ թոքաբորբը»։ Կրեմլի պաշտոնական ներկայացուցիչ Դմիտրի Պեսկովն էլ կոչ է արել առաջնորդվել Իրկուտսկի մարզում տիրող իրավիճակի վերաբերյալ պաշտոնական հայտարարություններին, այլ ոչ թե վստահել այլ աղբյուրների:
«Տվյալ դեպքում այս ոլորտում իրավասություն ունեցող առաջատար մարմինը Ռոսպոտրեբնադզորն է, որն ունի բարձր որակավորում ունեցող մասնագետներ»,-ասել է Պեսկովը։
«Բայկալի մարդիկ» պարբերականն էլ, հղում անելով տարածաշրջանային անվտանգության ծառայություններին մոտ կանգնած անանուն աղբյուրներին, հաղորդել է, որ լաբորանտուհին կարող էր վարակվել ժանտախտի թոքային ձևով՝ կոտրված փորձանոթի պատճառով։
