Շիրակի մարզի Ամասիա և Ազատան բնակավայրերում գյուղատնտեսական աշխատանքներն ավելի արդյունավետ կազմակերպելու համար նոր տեխնիկա և սարքավորումներ են տրամադրվել։ Այս մասին տեղեկացնում են ՀՀ էկոնոմիկայի նախարարությունից:
ՀՀ էկոնոմիկայի նախարարության կողմից՝ Ասիական զարգացման բանկի (ԱԶԲ) աջակցությամբ իրականացվող Կլիմայական փոփոխություններին հարմարեցվող պարենային անվտանգության բարձրացման ծրագրի շրջանակում երկու բնակավայրերի շահառուներին տրամադրվել է 13-ական մոտոբլոկ՝ համապատասխան գյուղատնտեսական սարքավորումներով։
Ծրագրով նախատեսված է տրամադրել բազմատեսակ օժանդակության փաթեթներ, ներառյալ մոտոբլոկներ, կցասայլեր, խոտհնձիչներ, գութաններ և սրսկիչներ:
Տեխնիկայի հանձնման միջոցառմանը մասնակցել են ծրագրի իրականացման թիմի, խորհրդատվական ծառայություններ մատուցող «Ավենյու քընսալթինգ գրուպ» ՍՊԸ և «3 ԱՐ ստրատեգիա» ՍՊԸ կոնսորցիումի ներկայացուցիչներ, ծրագրի շահառուներ, մարզպետարանի ներկայացուցիչներ ու համայնքների ղեկավարներ։
