Լիբանանի խորհրդարանը հավանություն է տվել մահապատժի վերացման մասին օրինագծին

Լիբանանի պատգամավորների պալատը ձայների մեծամասնությամբ հավանություն է տվել մահապատժի վերացման մասին օրինագծին՝ դրանում փոփոխություններ կատարելուց հետո: Այդ մասին հայտնում է լիբանանյան NNA գործակալությունը:

Օրենքի նախագիծը նախատեսում է լուծել մինչև օրենքի ուժի մեջ մտնելը կատարված հանցագործությունների համար առավել խիստ պատժի հարցը:

Մահապատիժը տարիներ շարունակ պաշտոնապես պահպանվել է Լիբանանի օրենսդրության մեջ, սակայն դրա կիրառումը փաստացի դադարեցվել է։ Երկրում մահվան վերջին դատավճիռն ի կատար է ածվել 2004 թվականին։