Մոսկվան Քիշնևին մեղադրել է դիվանագիտական նորմերը խախտելու համար
Ռուսաստանի արտգործնախարարություն է կանչվել Մոսկվայում Մոլդովայի դեսպան Լիլիան Դարին: Նրան բողոք են հայտնել Մոլդովայում Ռուսաստանի դեսպանության աշխատակիցների և տրանսպորտի հետ կապված երկու միջադեպի կապակցությամբ:
Ռուսական կողմի տվյալով՝ հուլիսի 19-ին Քիշնևում ոստիկանությունը կանգնեցրել է դեսպանության ավտոբուսը, հանել դիվանագիտական գրանցման նշանները և ուժ կիրառել դիվանագիտական առաքելության աշխատակիցների նկատմամբ:
Բացի դրանից՝ ռուս դիվանագետներն ավելի քան չորս ժամ պահվել են Մոլդովայի և Ռումինիայի սահմանին՝ երկրից դուրս գալու ժամանակ:
Մոսկվան հայտարարել է, որ այդ գործողությունները խախտում են «Դիվանագիտական հարաբերությունների մասին Վիեննայի կոնվենցիայի» դրույթները և զգուշացրել է հնարավոր հայելային պատասխան միջոցների մասին:
