Սպորտային մարմնամարզության Հայաստանի հավաքականի առաջատարներից Արթուր Դավթյանն ավարտել է ելույթը Գերմանիայի Կոտբուս քաղաքում ընթացող աշխարհի գավաթի խաղարկությունում:
Մրցումային երկրորդ օրը Դավթյանը հանդես է եկել հենացատկի և պտտաձողի վարժությունների որակավորման փուլում: Հենացատկում նա 13.100 միավորով գրավել է 20-րդ տեղը, իսկ պտտաձողի վարժությունում գրանցել է 13-րդ արդյունքը (13.733 միավոր):
Ավելի վաղ Արթուրին չէր հաջողվել եզրափակիչի ուղեգիր նվաճել նաև նժույգի թափերում (25-րդ տեղ) ու ազատ վարժությունում (29-րդ տեղ):
Աշխարհի գավաթի խաղարկությունում Հայաստանի մյուս 3 ներկայացուցիչներ Հարություն Մերդինյանը, Վահագն Դավթյանը և Արթուր Ավետիսյանը դուրս են եկել եզրափակիչ: Վահագն Դավթյանը և Արթուր Ավետիսյանը հանդես կգան օղակների վարժության եզրափակիչում, իսկ Հարություն Մերդինյանը՝ նժույգի թափերի:
Մրցաշարը վարկանիշային է Տոկիո-2020 օլիմպիական խաղերի համար: Հայ մարմնամարզիկներից օլիմպիական ուղեգիր ունի միայն Արթուր Դավթյանը, որը Տոկիո-2020-ում հանդես կգա հենացատկում:
