Հայաստանի և Ադրբեջանի համատեղ ջանքերով հնարավոր կլինի հասնել մշտական խաղաղության Հարավային Կովկասում. Ալիև
Իլհամ Ալիևը Դավոսում Համաշխարհային տնտեսական ֆորումի շրջանակում Euronews-ին տված հարցազրույցում հայտարարել է, որ Հարավային Կովկասը մտնում է զարգացման նոր փուլ։
«Մենք ապրում ենք խաղաղության պայմաններում ընդամենը հինգ-վեց ամիս, սովորում ենք այս իրավիճակին։ Մեր անկախության պատմության ընթացքում երբեք խաղաղության մեջ չենք ապրել։ Սա հրաշալի հնարավորություններ է բացում»,- շեշտել է Ադրբեջանի նախագահը։
Նրա խոսքով՝ այսօր Հայաստանի և Ադրբեջանի հարաբերություններն արդեն վերածվում են համագործակցության։
«Վերացրել ենք Հայաստան բեռնափոխադրումների բոլոր սահմանափակումները։ Ավելին, մենք սկսել ենք Հայաստանին մատակարարել կարևորագույն ապրանքներ, հիմնականում նավթամթերք։ Սա փոխշահավետ իրավիճակ է»,- մանրամասնել է Ալիևը:
Նա համոզմունք է հայտնել, որ Հայաստանի և Ադրբեջանի, այդ թվում՝ քաղհասարակության համատեղ ջանքերով հնարավոր կլինի հասնել ոչ թե երկարաժամկետ, այլ մշտական խաղաղության Հարավային Կովկասում:
«Մեր տարածաշրջանում կայունությունն այն է, ինչի մասին մշտապես մտածում ենք»,- նշել է Ալիևը:
