Հայաստանի շախմատի կանանց հավաքականը Եվրոպայի թիմային առաջնության 7-րդ խաղափուլում առավելության է հասել Հունգարիայի հավաքականի նկատմամբ
Հայաստանի շախմատի կանանց հավաքականը Եվրոպայի թիմային առաջնության 7-րդ խաղափուլում 2.5:1.5 հաշվով առավելության է հասել Հունգարիայի հավաքականի նկատմամբ: Այս մասին հայտնում է Հայաստանի շախմատի ֆեդերացիան:
Այսօր հաղթել են Մարիամ Մկրտչյանը և Սուսաննա Գաբոյանը: Լիլիթ Մկրտչյանի խաղն ավարտվել է ոչ-ոքի արդյունքով:
Հայաստանի տղամարդկանց հավաքականը 2:2 հաշվով ավարտեց իր հանդիպումը Իսպանիայի հավաքականի հետ:
Հաղթանակ է տարել Հայկ Մարտիրոսյանը: Շանթ Սարգսյանի և Ռոբերտ Հովհաննիսյանի խաղերն ավարտվել են ոչ-ոքի արդյունքով:
Առաջնության ավարտին մնացել է 2 խաղափուլ։
Այս պահին Հայաստանի կանանց հավաքականը 36 թիմերի մեջ կիսում է 5-9-րդ հորիզոնականները, իսկ տղամարդկանց հավաքականը 40 երկրների մեջ գտնվում է 10-րդ հորիզոնականում։
