ԱՄՆ վարչակազմը չի դադարեցրել զենքի մատակարարումն Ուկրաինային, սակայն ռազմական օգնության նոր փաթեթների ձևավորման վերաբերյալ որոշում չկա։ Այդ մասին հայտարարել է ԱՄՆ պետքարտուղար Մարկո Ռուբիոն:
«Կիևին սպառազինություն ուղարկելու այդ ծրագիրը չի չեղարկվել։ Նրանք շարունակում են զենք ստանալ»,- հստակեցրել է Ռուբիոն ԱՄՆ Կոնգրեսի Սենատի արտաքին հարաբերությունների հանձնաժողովում։
Նրա խոսքով՝ հակամարտությունը ռազմական լուծում չունի և պետք է ավարտվի բանակցությունների միջոցով:
Պետքարտուղարին հարցրել են, թե արդյոք Վաշինգտոնը պատրա՞ստ է Կոնգրեսից միջոցներ պահանջել Ուկրաինայի համար սպառազինության հերթական փաթեթ տրամադրելու նպատակով։
«Դա այլ հարց է: Սպիտակ տունը պետք է որոշում կայացնի՝ դիմե՞լ Կոնգրեսին լրացուցիչ ֆինանսավորման համար, թե ոչ։ Բայց այն ամենը, ինչ հաստատվել և հատկացվել է Կոնգրեսի կողմից, շարունակում է մատակարարվել»,- ասել է ԱՄՆ պետքարտուղարը։
