ABŞ-a işgüzar səfəri çərçivəsində sentyabrın 6-da ER müdafiə naziri Suren Papikyan Ermənistanın ABŞ-dakı fövqəladə və səlahiyyətli səfiri Lilit Makuntsun müşayiəti ilə Kanzas ştatında fəaliyyət göstərən Salina təlim mərkəzində olub.
Mərkəzdə müdafiə naziri Kanzas ştatının general-adyutantı, Milli Qvardiyanın komandanı, general-mayor Devid Veyşar ilə görüşüb.
Ermənistan Müdafiə Nazirliyindən verilən məlumata görə, görüş zamanı ABŞ ştatlarla tərəfdaşlıq proqramı çərçivəsində Ermənistanla Kanzas arasında əməkdaşlıqla bağlı bir sıra məsələlər müzakirə olunub.
“Müdafiə naziri əməkdaşlığın hazırkı səviyyəsini yüksək qiymətləndirərək, sülhməramlı missiya, hərbi təhsil və təlim, eləcə də hərbi tibb sahələrində böyük potensialın olduğunu vurğulayıb.
General-mayor Devid Veyşar da öz növbəsində qeyd edib ki, Ermənistan Respublikası onilliklər ərzində Kanzasın ənənəvi tərəfdaşı olub. O, qarşılıqlı maraq kəsb edən sahələrdə əməkdaşlığın inkişafı üçün maksimum səy göstərməyə hazır olduğunu bildirib”- məlumatda deyilir.
Mənbənin məlumatına görə, görüşün sonunda Ermənistan Respublikasının müdafiə nazirinin rəhbərlik etdiyi nümayəndə heyəti “Salina” təhsil mərkəzində tədris prosesi, təlimlər və hərbi təlimlərlə tanış olub.
