ABŞ, Ermənistan və Azərbaycan TRIPP — "Sülh və rifah naminə beynəlxalq nəqliyyat marşrutu" layihəsinin irəlilədilməsi məqsədilə üçtərəfli texniki planlaşdırma qruplarının fəaliyyətinə başlayıblar.
Birgə bəyanata əsasən, təşəbbüsdə ABŞ dövlət katibinin Avropa və Avrasiya məsələləri üzrə köməkçisi Brendan Hanrahan, Ermənistanın xarici işlər və beynəlxalq ticarət nazirinin müavini Vahan Kostanyan və Azərbaycanın xarici işlər nazirinin müavini Elnur Məmmədov iştirak edirlər.
Üçtərəfli format regional sabitliyin, iqtisadi inkişafın, nəqliyyat-kommunikasiya əlaqələrinin və ticarətin təşviqi məqsədilə üç ölkənin siyasətini formalaşdıran şəxsləri və texniki ekspertləri bir araya gətirir. Bəyanatda vurğulanır ki, bu proses 2025-ci il avqustun 8-də Prezident Donald Trampın vasitəçiliyi ilə qəbul edilmiş sülh sammitinin bəyannaməsindən irəli gəlir.
Tərəflər nəqliyyat və elektrik enerjisinin ötürülməsi məsələləri ilə məşğul olacaq ilk iki üçtərəfli işçi qrupun yaradılması barədə razılığa gəliblər. Bu qrupların fəaliyyəti mürəkkəb texniki problemlərə həll yolları tapmağa və layihənin həyata keçirilməsinin növbəti mərhələlərinə, o cümlədən TRIPP-in digər regional infrastrukturlarla əlaqələndirilməsinə keçidi təmin etməyə yönəlib.
Tərəflər TRIPP-in bütün komponentlərinin mümkün qədər tez işə salınmasına sadiqliklərini bir daha təsdiqləyiblər.
Ermənistanın xarici işlər və beynəlxalq ticarət naziri Ararat Mirzoyan daha əvvəl bildirmişdi ki, layihə çərçivəsində tikinti işləri 2027-ci ilin əvvəlində başlaya bilər.
