İsveçrə sülh sazişinin paraflanması ilə yaranmış müsbət dinamikanı alqışlayır. Demək olar ki, davamlı sülh artıq mümkündür. Bunu Ermənistanın xarici işlər və beynəlxalq ticarət naziri Ararat Mirzoyanla birgə mətbuat konfransı zamanı ATƏT sədri, İsveçrə Konfederasiyasının Xarici Əlaqələr Federal Departamentinin rəhbəri İqnatsio Kassis deyib.
ATƏT rəsmisinin sözlərinə görə, bu, yalnız Ermənistan və Azərbaycan üçün deyil, bütün Cənubi Qafqaz regionu üçün vacibdir. Eyni zamanda rəsmi şəxs vurğulayıb ki, xüsusilə humanitar məsələlərin həlli baxımından hələ də çətinliklər qalır.
“Əziz dost, mən sizin hər iki ölkənizi, imzalanmaya, sülhün və münasibətlərin normallaşmasının həyata keçirilməsinə nail olmaq üçün səyləri davam etdirməyə təşviq edirəm.
İsveçrə, hər iki tərəf istəsə, dialoq və sülh quruculuğu sahəsindəki təcrübəmizi nəzərə alaraq, bu prosesi dəstəkləməyə hazırdır. Ermənistanda uzunmüddətli təcrübəmiz də faydalı olacaq”, - deyə o bildirib.
