COP17 qlobal tədbirdir. Ermənistan tarixində ilk dəfə olaraq qlobal tədbirə, qlobal təşəbbüsə rəhbərlik edir. Gözləntilər böyükdür, Ermənistan Respublikasının həm ölkədə mövcud olan, həm də qlobal problemlərə aid bir sıra təşəbbüsləri var. Bu barədə parlamentdə jurnalistlərlə keçirdiyi brifinq zamanı Ermənistanın xarici işlər və beynəlxalq ticarət nazirinin müavini Robert Abisoğomonyan bildirib.
“Hazırda Ermənistan Respublikası təkcə öz görünürlüğünü təmin etmir, həm də qlobal ekoloji gündəmdə söz sahibi olur. Bu, təkcə həmin gündəm çərçivəsində əməkdaşlığa deyil, həm də ikitərəfli əlaqələrin möhkəmləndirilməsi baxımından Ermənistan üçün böyük imkan yaradır.
Ermənistan üçün ekoloji və təkcə ekoloji olmayan məsələlər ətrafında 196 tərəflə əlaqələr qurmaq imkanı var. Elə ölkələr var ki, onlarla əvvəllər təmas yaratmaq imkanımız olmayıb, COP17 isə bu imkanı verir”, - deyə o bildirib.
Robert Abisoğomonyan həmçinin COP-a ev sahibliyi etmiş ölkələrin nümayəndələri ilə təmasda olduğunu və öyrəndiyini bildirib ki, tədbirdən sonra həmin ölkələrdə turistlərin sayı bir neçə dəfə artıb.
COP17-nin keçirilməsinin Ermənistanın ekoloji problemlərinin, məsələn, havanın çirklənməsi məsələsinin həllinə necə təsir edəcəyi ilə bağlı suala cavab olaraq nazir müavini aydınlaşdırıb ki, COP17-nin keçirilməsi özlüyündə həmin ölkənin ekoloji problemlərinin və ya məsələlərinin olmadığı anlamına gəlmir.
“Biomüxtəliflik Konvensiyasına tərəf olan bir çox ölkədə belə ekoloji problemlər var. COP17 həm də Ermənistanın qarşısında duran problemlərin həllinə töhfə verəcək”, - deyə o bildirib.
Türkiyə və Azərbaycandan COP17-də iştirak etmək üçün nümayəndələrin gəlib-gəlməyəcəyi ilə bağlı suala cavabında Robert Abisoğomonyan bildirib ki, Türkiyə və Azərbaycan konvensiyanın tərəfləridir və sərbəst şəkildə qeydiyyatdan keçə bilərlər.
“Hazırda onların qeydiyyatdan keçib-keçmədiyinə dair məndə məlumat yoxdur. Hazırda bildiyimiz odur ki, 13 mindən bir qədər çox qeydiyyat olub, ola bilsin qeydiyyatdan keçiblər, ola bilsin keçməyiblər”, - deyə o bildirib.
