ER İnsan Hüquqları Müdafiəçisi (Ombudsman) Anahit Manasyan Strasburqda işgüzar səfərdədir. İnsan Hüquqları Müdafiəçisi Aparatı xəbər verir ki, səfər çərçivəsində iyulun 3-də Ombudsman Avropa Şurasının Demokratiya və İnsan Ləyaqəti üzrə Baş direktoru Marja Rutanen ilə görüşüb.
Bir sıra insan hüquqları sahələri ilə bağlı məsələlər, bərabərliyin təmin edilməsi və ayrı-seçkiliyin qarşısının alınması sahəsində problemlər müzakirə edilib.
Anahit Manasyan nifrət nitqi, ayrı-seçkilik və dözümsüzlük mühitinin aradan qaldırılması üçün genişmiqyaslı işlərin həyata keçirilməsinin vacibliyini vurğulayıb. Bu kontekstdə İnsan Hüquqları Müdafiəçisi Avropa Şurası ilə yaradılmış səmərəli əməkdaşlığı yüksək qiymətləndirib, xüsusilə Ermənistanda insan hüquqlarının müdafiəsi sisteminin inkişafında birgə proqramların vacibliyini vurğulayıb.
Tərəflər əməkdaşlığı genişləndirməyə hazır olduqlarını bildiriblər.
