“Rosaviasya”nın rəhbəri Dmitri Yadrov Azərbaycan təyyarəsinin Aktau yaxınlığında qəzaya uğraması ilə bağlı bəyanat yayıb. O qeyd edib ki, Rusiya tərəfi qazaxıstanlı və azərbaycanlı tərəfdaşları işin araşdırılmasında əməkdaşlığa tam hazır olduqları barədə dərhal məlumatlandırıb.
Dmitri Yadrov bildirib ki, həmin gün və həmin saatlarda Qroznı hava limanı ərazisində vəziyyət çox ağır olub.
“Həmin vaxt Ukraynanın döyüş PUA-ları Qroznı və Vladiqafqaz şəhərlərində mülki infrastruktura terror hücumları həyata keçirib. Bununla əlaqədar olaraq Qroznı hava limanının ərazisində bütün təyyarələrin qeyd olunan ərazidən dərhal uzaqlaşdırılmasını nəzərdə tutan “Xalça” rejimi tətbiq edilib.
Bundan əlavə, Qroznı hava limanı ərazisində qatı duman olub. 500 metr hündürlükdə heç bir görüntü mümkün olmayıb.
Təyyarə komandiri təyyarəni Qroznıya endirmək üçün iki dəfə cəhd edib, lakin hər iki cəhd uğursuz olub. Komandirə başqa hava limanları təklif olunub. O, Aktau hava limanına getmək qərarına gəlib.
