Տեղի է ունեցել ՀՀ ոստիկանության կոլեգիայի նիստը։ Ամփոփվել են ոստիկանության ծառայությունների և տարածքային մարմինների 2019 թ. օպերատիվ-ծառայողական գործունեության արդյունքները: Նիստը վարել է ոստիկանության պետի պաշտոնակատար Արման Սարգսյանը։ Մասնակցում էին ոստիկանության կոլեգիայի անդամներ, կենտրոնական ապարատի, մարզային և տարածքային ստորաբաժանումների ղեկավարներ:
Ոստիկանության ծառայությունների և տարածքային մարմինների 2019 թ. օպերատիվ-ծառայողական գործունեության արդյունքների մասին հաշվետու զեկույցով հանդես եկավ ոստիկանության պետի տեղակալ Արթուր Մարտիրոսյանը։ Նշվել է, որ 2019 թ. ընթացքում ՀՀ ոստիկանությունը կատարել է իր առջև դրված խնդիրները, օրենքով վերապահված լիազորությունների շրջանակներում ձեռնարկված միջոցառումների շնորհիվ վերահսկվել է օպերատիվ իրավիճակը, պահպանվել են հասարակական կարգն ու անվտանգությունը:
Արթուր Մարտիրոսյանը, ներկայացնելով հանրապետությունում արձանագրված հանցագործությունների շարժընթացը, նշել է, որ 2019 թ. ընթացքում Հանրապետությունում գրանցված հանցագործությունների ընդհանուր թվաքանակն աճել է 8,8%-ով կամ 2.172 դեպքով (2018 թ.` 24.678, 2019 թ.` 26.850), ինչը գլխավորապես պայմանավորված է գողությունների, ճանապարհային երթևեկության կանոնները խախտելու, ինչպես և առավել լատենտային համարվող՝ թմրամիջոցների հետ կապված հանցագործությունների և կեղծ փողեր, արժեթղթեր պատրաստելու, պահելու և իրացնելու դեպքերի հայտնաբերման աճով:
Գրանցված 26.850 հանցագործությունների մեծ մասը բաժին է ընկնում ոչ մեծ (54,4%) և միջին ծանրության (27,8%-ը) հանցագործություններին, որոնք համարվում են առավել նվազ հասարակական վտանգավորություն ներկայացնող հանցատեսակներ և կազմում են գրանցված ընդհանուր հանցագործությունների 82,2%-ը:
Չնայած հանցագործությունների թվի որոշակի աճին՝ 2019 թ. ընթացքում իրականացված ծավալուն օպերատիվ-կանխարգելիչ միջոցառումների արդյունքում էականորեն՝ շուրջ չորս անգամ կրճատվել է աճի տեմպը (2019 թ. հունվար՝ 35,3%, դեկտեմբեր՝ 8,8%):
Զեկուցողը նկատել է, որ դեպքերի աճը կարելի է պայմանավորել նաև այն հանգամանքով, որ բարձրացել է ՀՀ քաղաքացիների վստահությունը ոստիկանության նկատմամբ, և նրանք չեն խուսափում դիմել ոստիկանություն (եթե 2018 թ. ՀՀ ոստիկանության ստորաբաժանումներ ստացվել է 203.539 առերևույթ հանցագործության մասին հաղորդում, ապա 2019 թ. դրանց թիվն աճել է 42.882-ով` կազմելով` 246.421): Ի դեպ, 10,4%-ով աճել են այն դեպքերը, երբ քաղաքացիները դիմել են ոստիկանություն նախկինում չհայտնած դեպքերի վերաբերյալ:
Հանցավորության ընդհանուր կառուցվածքում շարունակվել է մարդու դեմ ուղղված հանցագործությունների տեսակարար կշռի նվազման միտումը (20,1%-ից 16,0%), փոխարենը` աճ է արձանագրվել սեփականության դեմ ուղղված հանցագործությունների տեսակարար կշռում (48,8%-ից՝ 52,9%):
Արթուր Մարտիրոսյանը ներկայացնելով բացահայտման աշխատանքները՝ նշել է, որ հաշվետու ժամանակահատվածում վարույթում քննվող քրեական գործերով անցնող 32.623 հանցագործության դեպքերի 58,0%-ով առկա է որպես մեղադրյալ ներգրավված անձ:
Ծանր հանցագործություններով բացահայտման արդյունավետությունը կազմում է 34,0%, առանձնապես ծանր հանցագործություններով՝ 57,8%:
Ըստ հիմնական հանցատեսակների՝ բացահայտման ընդհանուր ցուցանիշից առավել բարձր է սպանությունների՝ 72,7%, սպանության փորձերի՝ 70,5%, դիտավորությամբ առողջությանը վնաս պատճառելու՝ 84,6%, այդ թվում՝ ծանր՝ 72,2%, ճանապարհային երթևեկության կանոնների խախտման՝ 85,5%, ավազակության՝ 78,8%, խարդախության՝ 60,8%, յուրացման կամ վատնման՝ 59,0% և տրանսպորտային միջոց փախցնելու՝ 80,4% դեպքերի բացահայտման արդյունավետությունը:
Հաշվետու ժամանակահատվածում 46-ով (1.475-1.521) աճել է ինչպես նախկին տարիներին կասեցված քրեական գործերով հանցագործությունների բացահայտման աշխատանքների արդյունավետությունը, այնպես էլ 51-ով կամ 37,2%-ով հանցագործություն կատարած անձի ինքնությունը պարզված չլինելու պատճառաբանությամբ կասեցված քրեական գործերով բացահայտված հանցագործությունների թիվը (137-188):
Հաշվետու ժամանակահատվածում հայտնաբերվել է 1.280 կոռուպցիոն բնույթի հանցագործության դեպք, որից 324-ը կաշառակերության դեպքեր են, 225-ը ՝ պաշտոնեական դիրքն օգտագործելով՝ յուրացման, 135-ը՝ պաշտոնեական կեղծիքի, 299-ը՝ պաշտոնեական լիազորությունները չարաշահելու, 60-ը՝ պաշտոնեական լիազորություններն անցնելու և այլն:
Հաշվետու տարում ՀՀ տարածքում արձանագրվել է 4.799 ճանապարհատրանսպորտային պատահար, ինչի հետևանքով զոհվել է 341 և մարմնական վնասվածքներ ստացել 6.801 անձ:
Ոստիկանության պետի տեղակալները ներկայացրել են իրենց կողմից համակարգվող ոլորտներում կատարված աշխատանքները։
Խոսվել է 2019 թ.-ին ոստիկանության զորքերի իրականացրած ծառայության, ոստիկանությունում կառուցվածքային փոփոխությունների, միջազգային համագործակցության, օրենսդրական նախաձեռնությունների, կադրային քաղաքականության և այլ ոլորտներում կատարված աշխատանքների մասին։
Ոստիկանության պետի պաշտոնակատար Արման Սարգսյանը, վերլուծելով իրականացված աշխատանքը, շնորհակալություն է հայտնել սրտացավ ծառայության համար։ Նա խոսել է նաև բնակարանային գողությունների բացահայտման ուղղությամբ միջոցառումների ակտիվացման անհրաժեշտության, ոստիկանության տնտեսական ու կադրային քաղաքականության և այլ խնդիրների մասին։ Արման Սարգսյանը վեր է հանել նաև 2019 թ. ընթացում ոստիկանության ծառայողների թերություններն ու բացթողումները և նշել, որ ամեն ինչ կարվի դրանք վերացնելու համար։
Ընդգծելով, որ ծառայության հանդեպ անտարբեր ոստիկանը տեղ չունի համակարգում`ոստիկանության պետի պաշտոնակատարը նշել է, որ ամփոփումից և վերլուծությունից հետո կլինեն նաև կադրային փոփոխություններ։
Կոլեգիայի նիստի ավարտին ոստիկանության պետի պաշտոնակատար Արման Սարգսյանը հատուկ հանձնաժողովի կողմից տարբեր ծառայությունների գծով տարվա լավագույն ճանաչված ծառայողներին ու բաժինների պետերին հանձնել է լավագույնների դրոշներն ու պարգևները։
