ՀՀ վարչապետ Նիկոլ Փաշինյանը, Հանրային ՀԸ «Հարցազրույց» հաղորդման եթերում անդրադառնալով ԼՂ պաշտոնաթող նախագահ Արայիկ Հարությունյանի հրաժարականին, պատասխանելով հարցին` ինչու չշնորհավորեց նոր նախագահին, ասաց.
«Արայիկ Հարությունյանի հրաժարականի համար ափսոսում եմ, ամեն դեպքում, մեր միջև եղել է շատ լավ աշխատանքային մթնոլորտ և փոխըմբռնում, կարող եմ ափսոսանք հայտնել այդ հրաժարականի կապակցությամբ: Ինչ վերաբերում է նոր ընտրված առաջնորդին` իրադրությունն այնպիսին է, որ շնորհավորելու շատ բան չկա էլ, շատ ծանր պատասխանատվություն է դրված նրա վրա: Մենք այսօր նաև մեր դիրքորոշումները և մոտեցումները միջազգային հանրության տրամաբանության հետ համադրելու և չհակադրելու տրամաբանությամբ պիտի առաջնորդվենք, նաև` ԼՂ-ում հաստատված հումանիտար ճգնաժամը չքաղաքականացնելու նկատառումով. մեր ջանքերի կենտրոնացումը պետք է ուղղվի ԼՂ-ում հաստատված հումանիտար ճգնաժամի հաղթահարմանը, չպետք է թույլ տանք, որ ավելորդ քաղաքականացմամբ հարցի հումանիտար էությունը ձևափոխվի քաղաքականի»:
Փաշինյանը տեղեկացրեց` ՀՀ և ԼՂ իշխանությունների միջև շփումը եղել է, կա, դա առաջին աղբյուրից տեղեկատվություն ստանալու առումով կարևոր է:
