Սոչիում մեկնարկել են Ռուսաստանի և Թուրքիայի նախագահներ Վլադիմիր Պուտինի և Ռեջեփ Էրդողանի ընդլայնված ձևաչափով բանակցությունները: Հանդիպումից առաջ նախագահները կարճ զրույց են ունեցել: Վլադիմիր Պուտինը նշել է, որ Ռուսաստանի և Թուրքիայի միջև հարաբերությունների զարգացման տեմպը պահպանվում է: Նա նաև հույս է հայտնել, որ մոտ ապագայում հնարավոր կլինի ավարտել գազային հանգույցի ստեղծման շուրջ բանակցությունները՝ էներգետիկ ոլորտում իրավիճակն ավելի կայուն դարձնելու համար։
Ռուսական և թուրքական լրատվամիջոցները հայտնում են, որ Թուրքիայի ղեկավարը Սոչի է եկել Ռուսաստանի նախագահի հետ անձամբ քննարկելու հացահատիկի գործարքը վերսկսելու հնարավորությունը։ Պուտինը Սոչիում Էրդողանի հետ հանդիպման ժամանակ ասել է, որ Մոսկվան պատրաստ է բանակցելու հացահատիկի գործարքի շուրջ։
«Ես գիտեմ, որ դուք այսօր ցանկանում եք բարձրացնել հացահատիկի գործարքի հարցը։ Մենք բաց ենք այս հարցի բանակցությունների համար»,- ասել է ՌԴ նախագահը։
Էրդողանը մտադիր է նաև հայտարարել ուկրաինական հակամարտությունը լուծելու համար որպես միջնորդ լինելու՝ Անկարայի պատրաստակամության մասին։
Ըստ տեղեկությունների՝ Ռուսաստանի և Թուրքիայի նախագահները կքննարկեն Մոսկվայի և Կիևի միջև գերիների փոխանակումը, ռուսական գազը թուրքական տարածքով եվրոպական երկրներ փոխադրելու, ինչպես նաև երկկողմ համագործակցության հարցեր։
