Բրյուսելի դատարանը մեկ ամսով երկարացրել է Եվրախորհրդարանի պատգամավոր Եվա Քայլիի նախնական կալանքի ժամկետը՝ մերժելով փաստաբանների՝ էլեկտրոնային ապարանջանը որպես խափանման միջոց օգտագործելու միջնորդությունը։
Ըստ դատախազության՝ որոշումը կարող է բողոքարկվել 24 ժամվա ընթացքում։ Քայլիի փաստաբանն ասել է, որ քաղաքական գործիչը չի նախատեսում վերաքննիչ բողոք ներկայացնել, գրում է Reuters-ը։
Եվրախորհրդարանի նախկին փոխնախագահին, որը դեկտեմբերի 13-ին հեռացվեց պաշտոնից, կասկածում են Կատարի հետ կոռուպցիոն կապերի համար։ Բացի Քայլիից, ևս երեք անձի մեղադրանք է առաջադրվել՝ «հանցավոր կազմակերպությանն անդամակցելու», «փողերի լվացման» և «կոռուպցիայի» հոդվածներով։
Ընդհանուր առմամբ, խուզարկությունների ժամանակ բելգիացի քննիչներն առգրավել են 1,5 միլիոն եվրո կանխիկ գումար։
Լրատվական գործակալությունները, վկայակոչելով դատական աղբյուրները, հայտնում են, որ Եվրախորհրդարանի պատգամավորի բնակարանում հայտնաբերվել են 150 հազար եվրո թղթադրամներով պայուսակներ։ Եվա Քայլիի պաշտպանական կողմի համաձայն՝ քաղաքական գործիչը չի իմացել դրանց գոյության մասին։
48 ժամով ձերբակալվել է նաև կասկածյալի հայրը, որի մոտ Բրյուսելում հայտնաբերվել է ճամպրուկ՝ լի 750 հազար եվրո թղթադրամներով:
