Իրանը Գործողությունների համատեղ համապարփակ ծրագրի (ԳՀՀԾ) վերականգնման շրջանակներում հրաժարվել է մի շարք առանցքային պահանջներից, մասնավորապես՝ մի շարք օբյեկտներում ուրանի հետքերի ծագման վերաբերյալ միջազգային հետաքննությունը փակելու պահանջից: Այս մասին հայտնել է Reuters գործակալությունը՝ վկայակոչելով ԱՄՆ-ի պաշտոնյայի:
«Նախորդ շաբաթ նրանք փաստացի հրաժարվեցին գործարքին խանգարող գլխավոր պահանջներից։ Կարծում ենք, որ նրանք վերջապես անցել են ռուբիկոնը և ընդառաջ են գնացել հնարավոր գործարքին այն պայմաններով, որոնք ընդունելի են ԱՄՆ նախագահ Ջո Բայդենի համար։ Եթե նույնիսկ հաջողվել է մոտեցնել դիրքորոշումները, դա Իրանի քայլի շնորհիվ է»,- ասել է գործակալության զրուցակիցը:
Նրա խոսքով՝ Վաշինգտոնն առայժմ ուսումնասիրում է Իրանի պատասխանը։ Եթե գործարքը հաջողվի, ԱՄՆ-ը կչեղարկի մի շարք պատժամիջոցներ, իսկ Իրանը պետք է դադարեցնի միջուկային ծրագիրը:
