Բիձինա Իվանիշվիլին, որը մեկուկես տարի առաջ հայտարարեց քաղաքականությունից հեռանալու մասին, երկար ժամանակ անց առաջին անգամ հայտարարություն է արել, նշում է Georgia News պորտալը։ Իվանիշվիլին հուլիսի 27-ի բաց նամակում ասել է, որ «որոշ ուժեր ակտիվորեն փորձում էին Վրաստանը ներքաշել պատերազմի մեջ», և Credit Suisse-ի կողմից նրա ակտիվների սառեցումը դրա ուղղակի հետևանքն է։
Իվանիշվիլիի խոսքով՝ «Վրացական երազանքի» ջանքերի շնորհիվ «հնարավորինս չեզոքացվում է Վրաստանի՝ պատերազմի մեջ ներքաշվելու» ռիսկը։
Ինչպես հայտնում է EADaily-ն, հունիսին ԵՄ-ն Ուկրաինային և Մոլդովային միությանն անդամակցության թեկնածուի կարգավիճակ շնորհեց, իսկ Վրաստանին 12 պայման է առաջադրվել, որոնք պետք է կատարի։ Պայմաններից մեկը Վրաստանի «ապաօլիգարխացումն» է։ ԵՀ-ում դա նշանակում է, որ երկիրը պետք է հաղթահարի «անձնական շահերի չափազանց մեծ ազդեցությունը տնտեսական, քաղաքական ու սոցիալական կյանքի վրա»։ Եվրախորհրդարանն էլ բանաձև է ընդունել, որով կոչ է անում պատժամիջոցներ կիրառել իշխող «Վրացական երազանքի» հիմնադիր Բիձինա Իվանիշվիլիի նկատմամբ։ Փաստաթուղթում նրան անվանել են օլիգարխ, որը «կապված է Կրեմլի հետ և բացասաբար է ազդում Վրաստանում ժողովրդավարության զարգացման վրա»։
«Վրացական երազանք»-ի նախագահ Իրակլի Կոբախիձեն վստահեցրել է, որ իրենք կարդարացնեն Իվանիշվիլիի հույսերը, և իշխող կուսակցությունը բոլոր ջանքերը կգործադրի «ԱՄՆ-ի ու ԵՄ-ի հետ նորմալ հարաբերություններ» ապահովելու համար։
