Ընդդիմադիր պատգամավորների լիազորությունների դադարեցման հարցով ՍԴ դիմելու ԱԺ խորհրդի նիստը չի կայացել

Հայաստանի Ազգային ժողովի խորհրդի այսօրվա արտահերթ նիստում ժամը 10:30-ին համապատասխան թվով խորհրդի անդամներ չեն գրանցվել:

ԱԺ նախագահի տեղակալ Ռուբեն Ռուբինյանը տեղեկացրել է, որ «Ազգային ժողովի կանոնակարգ» սահմանադրական օրենքի 27-րդ հոդվածի 2-րդ և ԱԺ խորհրդի աշխատակարգի 6-րդ մասերի համաձայն, եթե խորհրդի գրանցված անդամների թիվը նիստի իրավազորության համար բավարար չէ, ապա գրանցումը շարունակվում է մինչև անհրաժեշտ թվով խորհրդի անդամների գրանցվելը, բայց ոչ ավելի, քան երկու ժամ:

Մինչև ժամը 12:30-ը քվորում չի ապահովվել. ԱԺ խորհրդի արտահերթ նիստը համարվել է չկայացած:

Օրակարգում Ազգային ժողովի պատգամավորների լիազորությունները դադարեցնելու հարցով Սահմանադրական դատարան դիմելու մասին հարցն էր:

Հիշեցնենք՝ ավելի վաղ հայտնել էինք՝ ԱԺ խորհուրդը պատրաստվում է դիմել ՍԴ՝ ընդդիմադիր խմբակցությունների 33 պատգամավորների լիազորությունները դադարեցնելու հարցով:

Նախագիծն առնչվում է «Հայաստան» և «Պատիվ ունեմ» խմբակցությունների 32 պատգամավորի։