Ռուսաստանը մինչ այժմ որևէ «լուրջ» բան չի արել Ուկրաինայում։ Այս մասին հայտարարել է ՌԴ նախագահ Վլադիմիր Պուտինը Պետդումայի խմբակցությունների ղեկավարների հետ հանդիպմանը, հայտնում է «ՌԻԱ Նովոստին»:
«Այսօր մենք լսում ենք, որ մեզ ուզում են հաղթել մարտի դաշտում։ Ի՞նչ ասեմ, թող փորձեն»,- ասել է Պուտինը։ Նա ընդգծել է, որ պատասխանատվությունը այն ամենի համար, ինչ կատարվում է այժմ Ուկրաինայում, կրում է հավաքական Արևմուտքը:
«Բոլորը պետք է իմանան, որ, մեծ հաշվով, մենք դեռ որևէ լուրջ բան չենք սկսել։ Միաժամանակ մենք չենք հրաժարվում խաղաղ բանակցություններից։ Բայց նրանք, ովքեր հրաժարվում են, պետք է իմանան, որ հետագայում ավելի դժվար կլինի բանակցել մեզ հետ»,- եզրափակել է ՌԴ նախագահը։
Հունիսի վերջին Պուտինը հայտարարեց, որ Ուկրաինայում հատուկ գործողությունն ընթանում է ըստ պլանի, և կարիք չկա դրա ավարտը հարմարեցնել որևէ ժամկետի։ Նա հավելել է, որ հատուկ գործողության վերջնական նպատակը «Դոնբասի ազատագրումն է, այդ մարդկանց պաշտպանությունը և այնպիսի պայմանների ստեղծումը, որոնք կերաշխավորեն հենց Ռուսաստանի անվտանգությունը»։
