Լուրերը, թե ես կամ իմ ընտանիքի անդամները մասնակցել ենք տեղի ունեցած ողբերգական դեպքին, բացարձակ սուտ են. Մաթևոս Ասատրյան
ՀՀ ԱԺ «Քաղաքացիական պայմանագիր» խմբակցության պատգամավոր Մաթևոս Ասատրյանը Ֆեյսբուքի իր էջում անդրադարձել է մամուլում իր անվան շուրջ շրջանառվող որոշ լուրերի:
«Հարգելի քաղաքացիներ, հայտնում եմ, որ արդեն մի քանի ժամ մամուլում և որոշ անբարոյական քաղաքական գործիչների կողմից տարածվող լուրերը, թե ես կամ իմ ընտանիքի անդամները մասնակցել ենք ժամեր առաջ տեղի ունեցած ողբերգական դեպքին, բացարձակ սուտ են և աղերս չունեն իրականության հետ։
Ակնհայտ է, որ մարդասպանությունը նվիրական հավատամք դարձրածները այս սուտ լուրերով փորձում են հավասարության նշան դնել մեր և իրենց միջև։ Չի՛ հաջողվելու, սրիկաներ։
Ցավակցում եմ մահացածի հարազատին, ապաքինում եմ մաղթում վիրավորներին, վստահ եմ՝ շուտով գործն ամբողջությամբ կբացահայտվի։ Խոհեմություն բոլորիս»։
ՀՀ ոստիկանությունն ավելի վաղ հայտնել էր՝ Նիգավանում կենցաղային հարցի շուրջ ծագած վեճի հետևանքով կրակոցներ են հնչել, կան վիրավորներ, 1 մարդ մահացել է։
