Մոսկվային անհանգստացնում են Սիրիայի հյուսիսում նոր ռազմական գործողություն սկսելու մասին Անկարայի հայտարարությունները՝ գրում է Interfax-ը։
«Նման քայլը Դամասկոսի հետ համաձայնության բացակայության դեպքում կընդունվի Սիրիայի Արաբական Հանրապետության ինքնիշխանության և տարածքային ամբողջականության ուղղակի խախտում և կհրահրի լարվածության լրացուցիչ սրում այդ երկրում։ Մենք հուսով ենք, որ Անկարան զերծ կմնա այնպիսի գործողություններից, որոնք կարող են հանգեցնել Սիրիայում առանց այն էլ բարդ իրավիճակի վտանգավոր վատթարացման»,- ասել է ՌԴ ԱԳՆ պաշտոնական ներկայացուցիչ Մարիա Զախարովան՝ մեկնաբանելով Թուրքիայի նախագահ Էրդողանի հայտարարությունը Սիրիայի հյուսիսում նոր ռազմական գործողություն սկսելու մասին։
Միևնույն ժամանակ, ՌԴ ԱԳՆ-ն ըմբռնումով է վերաբերվում Թուրքիայի մտահոգություններին` կապված Սիրիայի սահմանամերձ շրջաններից սպասվող ազգային անվտանգության սպառնալիքների հետ:
«Կարծում ենք՝ Սիրիայի և Թուրքիայի միջև սահմանին հնարավոր է անվտանգություն ապահովել դրան հարակից գոտում Սիրիայի անվտանգության ուժերի անձնակազմի տեղակայման միջոցով»,- ընդգծել է Մարիա Զախարովան։
Ավելի վաղ Էրդողանը հայտարարել էր, որ երկրի սահմաններին Թուրքիայի զինված ուժերը ծրագրել են Սիրիայի չորս շրջանում իրականացնել հակաահաբեկչական գործողություններ։
Վաշինգտոնն արդեն դեմ է արտահայտվել Անկարայի այդ մտադրությանը, քանի որ, ըստ ամերիկյան կողմի, դա կարող է էլ ավելի ապակայունացնել իրավիճակը տարածաշրջանում և խաթարել ԻՊ-ի դեմ պայքարի ջանքերը:
