Բոլոր ուկրաինացի գերիները, որոնք հանձնվել են Ազովստալում, պահվում են ԴԺՀ-ի տարածքում: Նախատեսվում է միջազգային տրիբունալ կազմակերպել՝ նրանց դատելու համար, Interfax-ին ասել է ԴԺՀ-ի ղեկավար Դենիս Պուշիլինը։ Նրա խոսքով՝ «Այժմ մշակվում է տրիբունալի կանոնադրությունը»։
Ընդհանուր առմամբ, մայիսի 16-ից հանձնվել է Մարիուպոլի «Ազովստալ» գործարանում տեղակայված ուկրաինական «Ազով» գնդի 2439 զինծառայող, այդ թվում՝ Ուկրաինայի զինված ուժերի զինծառայողներ, 78 կին, նախնական տվյալներով, կան օտարերկրացիներ, հայտնել է ՌԴ պաշտպանության նախարարության խոսնակ Իգոր Կոնաշենկովը։
ՌԴ պաշտպանության նախարարությունը հայտարարել է, որ «Ազովստալ» գործարանը և դրա ստորգետնյա օբյեկտներն ամբողջությամբ անցել են ռուսական բանակի վերահսկողության ներքո։
Կրեմլն էլ կասկածի տակ է դրել Ուկրաինայի խորհրդարանի պատգամավոր Վիկտոր Մեդվեդչուկին «Ազովստալի» հանձնված ուկրաինացի զինվորականի հետ փոխանակելու հնարավորությունը։
«Մենք արդեն ասել ենք, որ Մեդվեդչուկն Ուկրաինայի քաղաքացի է և զինվորական չէ: Ազովստալում հանձնված անձանց դեպքում խոսքը զինվորականների և ազգայնական կազմավորումների անդամների մասին է, ուստի դրանք բոլորովին այլ կատեգորիայի մարդիկ են: Այստեղ դժվար թե խոսվի որևէ փոխանակման մասին»,- երկուշաբթի լրագրողներին ասել է ՌԴ նախագահի մամուլի քարտուղար Դմիտրի Պեսկովը:
