Իտալիայի արտաքին գործերի նախարար Լուիջի Դի Մայոն հայտարարել է, որ իր երկիրը պատրաստ է ընդգրկվել Ուկրաինայի չեզոք կարգավիճակի երաշխավորների շարքում:
«Մեզ համար հիմնական առաջնահերթությունը բանակցային գործընթացի շարունակությունն է։ Թուրքիայի ձեռնարկած գործողությունները բարձր են գնահատվում։ Բանակցությունների արդյունքները վերլուծվելու են։ Իտալիան պատրաստ է հանդես գալ որպես Ուկրաինայի չեզոք կարգավիճակի երաշխավոր», - նշել է Իտալիայի գլխավոր դիվանագետը:
Ռուսաստանի նկատմամբ պատժամիջոցների պայմաններում նա կարևորել է էներգետիկ ոլորտի դիվերսիֆիկացումը, այդ թվում՝ Ադրբեջանի հետ համագործակցության միջոցով:
Դի Մայոյի խոսքով՝ Իտալիան մտադիր է թուլացնել էներգետիկ ոլորտում կախվածությունը ռուսական շուկայից: «Այդ նպատակով Հռոմը մտադիր է ակտիվացնել աշխատանքը Միջերկրածովյան տարածաշրջանի ուղղությամբ», - հավելել է Իտալիայի ԱԳ նախարարը:
