Հունաստանում ՀՀ արտակարգ և լիազոր դեսպան Տիգրան Մկրտչյանը առցանց հյուրընկալվել է «Մշակութային դիվանագիտության հունական ինստիտուտի» հատուկ դասընթացին, որի ընթացքում հանդես է եկել դասախոսությամբ՝ «Մշակութային դիվանագիտությունը իրարանցումների դարաշրջանում» վերնագրով։ Այդ մասին ասված է դեսպանության Ֆեյսուքի էջում:
«Տիգրան Մկրտչյանն իր դասախոսության առաջին մասում ներկայացրել է մշակութային դիվանագիտությունը որպես հանրային դիվանագիտության բաղկացուցիչ մաս, խոսել է մշակութային դիվանագիտության հիմունքների, համառոտ նախապատմության, դերակատարների մասին, անդրադարձել մշակութային դիվանագիտության արտահայտման ձևերին, տարատեսակներին։
Դասընթացի ունկնդիրներին պատասխանելիս, ի թիվս այլ հարցերի, դեսպանն անդրադարձել է Արցախում հայկական մշակութային ժառանգությանը սպառնացող վտանգների, վանդալիզմի դեպքերին։ Այս համատեքստում դեսպանն ընդգծել է, որ Ադրբեջանի կողմից շարունակաբար խախտվում են ՄԱԿ-ի Արդարադատության միջազգային դատարանի բոլոր միջանկյալ միջոցները, այդ թվում նաև հայկական մշակութային ժառանգության վերաբերյալ։
Դեսպանը խոսել է մարտի 10-ին Եվրոպական Միության խորհրդարանի կողմից ընդունված «Լեռնային Ղարաբաղում մշակութային ժառանգության ոչնչացման մասին» բանաձևի մասին։
Դեսպան Մկրտչյանը ներկայացրել է նաև հայ-ադրբեջանական սահմանին, ինչպես նաև՝ Արցախում տեղի ունեցող զարգացումների, Ադրբեջանի կողմից հրադադարի համաձայնագիրը խախտող գործողությունների մասին՝ այդ համատեքստում կարևորելով միջազգային հանրության կողմից հասցեական կոչերի, ինչպես նաև՝ պրակտիկ քայլերի հետևողականությունը որպես սադրանքները և էսկալացիան կանխարգելող հնարավոր միջոցներ»,- նշված է գրառման մեջ։
