Ուկրաինայի նախագահ Վոլոդիմիր Զելենսկին հայտարարել է, որ Ուկրաինայում ոչ ոք զանգվածային ոչնչացման զենք չի մշակել՝ հայտնում է Interfax-ը։
«Իմ հողի վրա քիմիական կամ զանգվածային ոչնչացման որևէ զենք չի մշակվել, և ամբողջ աշխարհը դա գիտի»,- ասել է նա տեսաուղերձում:
Զելենսկին նաև նշել է, որ Ուկրաինայում լաբորատորիաները «մնացել են խորհրդային ժամանակներից և զբաղվում են սովորական գիտությամբ», այլ ոչ թե ռազմական տեխնոլոգիաներով։
Ավելի վաղ ՌԴ ՊՆ-ն հայտարարել էր, որ Պենտագոնի հետ համատեղ ծրագրերի շրջանակում Ուկրաինայի տարածքում գործում է վտանգավոր վարակների հարուցիչների հետ աշխատող 30 կենսաբանական լաբորատորիա։
Պենտագոնը հերքել է այդ պնդումը՝ վստահեցնելով, որ ԱՄՆ-ն ուկրաինական հողում կենսաբանական զենք չի մշակում։ Միևնույն ժամանակ, ԱՄՆ պետքարտուղարի քաղաքական հարցերով տեղակալ Վիկտորյա Նուլանդը նշել է, որ Ուկրաինայում կան կենսաբանական հետազոտությունների համար օբյեկտներ, և Վաշինգտոնը մտահոգված է, որ «ռուսական ուժերը կփորձեն հսկողություն հաստատել դրանց նկատմամբ»։
