Եվրամիության նոր պատժամիջոցները կուղղվեն Բելառուսի բանկային հատվածի, կրիպտոարժույթների դեմ, դրանք նաև ներառելու են Ռուսաստանին ծովային տեխնոլոգիաների մատակարարման արգելքը: Եվս 160 ֆիզիկական անձ՝ 14 գործարար և 146 խորհրդարանական, կընդգրկվի սև ցուցակում: Այդ մասին Twitter-ում հայտնել է Եվրահանձնաժողովի նախագահ Ուրսուլա ֆոն դեր Լայենը՝ գրում է ՏԱՍՍ-ը։
Ընդհանուր առմամբ, նոր պատժամիջոցների ցանկում է Ռուսաստանի 862 ֆիզիկական անձ և 53 կազմակերպություն։
Ավելի վաղ հաղորդել էին, որ ԵՄ Խորհրդում Ֆրանսիայի նախագահությունը, կազմակերպության երկրների մշտական ներկայացուցիչները պայմանավորվել են նոր պատժամիջոցների հարցում՝ ռուս առաջնորդների և գործարարների, ինչպես նաև նրանց ընտանիքների դեմ։ Ֆրանսիական կողմը պարզաբանել է, որ պատժամիջոցները նախատեսում են «SWIFT համակարգից բելառուսական երեք բանկերի անջատում»։
Պատժամիջոցների այս փաթեթն ուժի մեջ կմտնի մարտի 10-ին։
