Մինսկում Կիևի հետ հնարավոր բանակցությունները չեն խանգարի, որ Ռուսաստանն Ուկրաինայում շարունակի իրականացնել հատուկ ռազմական գործողությունը՝ ըստ Interfax-ի՝ հայտարարել է ՌԴ ԱԳՆ պաշտոնական ներկայացուցիչ Մարիա Զախարովան:
Նա հիշեցրել է, որ ԱԳՆ-ն, ի պատասխան Ուկրաինայի նախագահ Վոլոդիմիր Զելենսկու խնդրանքին, պատրաստ է սկսել այդ բանակցությունների նախապատրաստական աշխատանքները։ Սակայն «խնդիրները, որոնք արդեն կան, նախագահ Պուտինը դրել էր նախքան համապատասխան հատուկ գործողության իրականացման մեկնարկը: Իհարկե, ոչ ոք դրանք չի չեղարկել, դրանք արդիական են»,- հավելել է Զախարովան։
Նրա խոսքով՝ դեռ վաղ է խոսել բանակցությունների մակարդակի մասին, ԱԳՆ-ն կկարողանա արագ պատվիրակություն կազմել: «Ավելի կարևոր է «ուկրաինական կողմի պատասխանատու պահվածքը»,- ասել է Զախարովան։
Մոսկվան Կիևից ակնկալում է նաև կոնսոլիդացված մոտեցում բանակցություններին: «Մենք պետք է հասկանանք, թե ինչ է խնդրում նախագահ Զելենսկին իր ուղերձներում, իսկ նրա թիմը չպետք է այլ ազդակներ հաղորդի նման դիմումներից հետո»,- եզրափակել է նա։
