Մոսկվայում ԱՄՆ դեսպանատունը նախազգուշացրել է ամերիկացի քաղաքացիներին Ռուսաստանում հասարակական վայրերում ահաբեկչական հարձակումների սպառնալիքի մասին, հայտնում է meduza.io-ը։
«Լրատվամիջոցների տվյալներով՝ հարձակումների սպառնալիքներ են եղել խոշոր քաղաքների, այդ թվում՝ Մոսկվայի և Սանկտ Պետերբուրգի առևտրի կենտրոնների, երկաթուղու և մետրոյի կայարանների ու մարդաշատ այլ վայրերի վրա, ինչպես նաև Ուկրաինայի հետ Ռուսաստանի սահմանային շրջաններում», - ասված է դեսպանատան կայքում։
Գերատեսչությունը, սակայն, չի ներկայացնում լրատվամիջոցների հրապարակումները, որոնցից հնարավոր է եզրակացություն անել ահաբեկչական հարձակումների սպառնալիքի մասին։
ԱՄՆ դիվանագետները Ռուսաստանում գտնվող համաքաղաքացիներին խորհուրդ են տալիս հետևել լրատվամիջոցներին, խուսափել ամբոխից, կապի մեջ լինել ընկերների և ընտանիքի հետ, ունենալ Ռուսաստանից տարհանման ծրագիր՝ «որը չի ենթադրում ԱՄՆ կառավարության աջակցությունը»:
ՌԴ ԱԳՆ պաշտոնական ներկայացուցիչ Մարիա Զախարովան արձագանքել է ամերիկյան դեսպանատան հրապարակմանը իր Telegram ալիքում։ «Հարց Մոսկվայում ԱՄՆ դեսպանատանը. Դուք համապատասխան տվյալները գործընկեր ուղիներով փոխանցե՞լ եք ձեր ռուս գործընկերներին: Եթե ոչ, ինչպե՞ս կարելի է դա հասկանալ», գրել է Զախարովան:
Ավելի վաղ՝ հունվարի սկզբին, ԱՄՆ դեսպանատունը համաքաղաքացիներին խորհուրդ էր տվել զերծ մնալ Ռուսաստան մեկնելուց, այդ թվում՝ Ուկրաինայի հետ սահմանին շարունակվող լարվածության պատճառով։ Բացի այդ, նախազգուշացման մեջ խոսվում էր Հյուսիսային Կովկասում ահաբեկչական հարձակումների վտանգի մասին։ Ուկրաինայի շուրջ իրադրության սրման ֆոնին ԱՄՆ Պետդեպարտամենտը նաև խորհուրդ է տվել ամերիկացիներին զերծ մնալ Ուկրաինա և Բելառուս մեկնելուց։
