Թայվանի վարչակազմի՝ անկախության ճանապարհով շարժումը խրախուսելու ԱՄՆ փորձերը կարող են Պեկինի և Վաշինգտոնի միջև զինված հակամարտության սպառնալիք ստեղծել: Այդ մասին հայտարարել է ԱՄՆ-ում Չինաստանի դեսպան Ցին Գանը, փոխանցում է Bloomberg-ը:
«Թայվանի հարցը Չինաստանի և Միացյալ Նահանգների միջև ամենամեծ «վառոդի տակառն» է: Եթե Թայվանի վարչակազմը ԱՄՆ-ի խրախուսմամբ շարունակի անկախության ճանապարհով գնալ, դա, ամենայն հավանականությամբ, կհանգեցնի նրան, որ Միացյալ Նահանգներն ու Չինաստանը՝ երկու գերերությունները, կներգրավվեն ռազմական հակամարտության մեջ»,- ասել է դիվանագետը:
Գանի խոսքով՝ «Մեկ Չինաստանի» քաղաքականությունը Պեկինի և Վաշինգտոնի հարաբերությունների կարևորագույն հիմքն է։ Նա նշել է, որ վերջերս Թայվանին վերաբերող հարցերում լարվածության աճ է գրանցվել:
«ԱՄՆ-ը մի փոքր հեռանում է իր պարտավորություններից՝ ամրապնդելով կապերը պաշտոնական մակարդակով, դրանք նոր մակարդակի հասցնելով, ավելի շատ նորագույն սպառազինություն, նույնիսկ զինվորականներ ուղարկելով Թայվան»,- ընդգծել է դեսպանը:
Գանը նշել է, որ Թայվանի նեղուցի երկու կողմում էլ չինացիներ են, և Չինաստանը չի պատրաստվում պատերազմել իր հայրենակիցների դեմ, այլ քայլեր է ձեռնարկելու խաղաղ վերամիավորման համար: Միևնույն ժամանակ նա զգուշացրել է, որ ԱՄՆ-ի նման քաղաքականության պայմաններում Չինաստանը «պարտավորություն չի ստանձնի՝ հրաժարվելու վերամիավորման այլ ճանապարհներից»:
