Ղազախստանի նախկին նախագահ Նուրսուլթան Նազարբաևի շրջապատի մարդկանց պաշտոնանկությունները շարունակվում են:
Պաշտոնից ազատվել է Ղազախստանի Ազգային անվտանգության կոմիտեի ղեկավարի առաջին տեղակալ Սամաթ Աբիշը՝ հայտնում է հանրապետության նախագահի մամուլի ծառայությունը։
Նա Ղազախստանի առաջին նախագահի եղբորորդին է՝ գրում է Interfax-ը։
ТАСС-ն էլ հաղորդում է, որ Նազարբաևի փեսան՝ Թիմուր Կուլիբաևը, հրաժարական է տվել Ղազախստանի ձեռներեցների ազգային պալատի՝ «Ատամեկենի» նախագահի պաշտոնից։ Կուլիբաևը Նազարբաևի դուստերից մեկի՝ Դինարա Կուլիբաևայի ամուսինն է։
Ավելի վաղ Նազարբաևի ևս երկու փեսա էր հեռացել Ղազախստանի խոշոր ազգային ընկերություններում ղեկավար պաշտոններից: Նախկին նախագահի կրտսեր դստեր ամուսինը՝ Դիմաշ Դոսանովը, ազատվել էր «ԿազՏրանսՕյլ» բաժնետիրական ընկերության խորհրդի նախագահի պաշտոնից: Կայրաթ Շարիպբաևը, որը ոչ պաշտոնապես ամուսնացած է Նազարբաևի ավագ դստեր՝ Դարիգայի հետ, հրաժարական է տվել QazaqGaz ԲԸ ազգային ընկերության խորհրդի նախագահի պաշտոնից։
