«Հայաստան» խմբակցությունն առաջարկել էր ՀԱՊԿ շրջանակում ՀՀ ԶՈՒ ստորաբաժանումներ Ղազախստան ուղարկելու և ամբողջ գործընթացի հետ կապված աշխատանքային քննարկում կազմակերպել: Պաշտպանության և անվտանգության հարցերի հանձնաժողովի նիստում խմբակցության անդամ Գեղամ Մանուկյանն առաջարկեց նիստի ավարտին կազմակերպել քննարկումը, սակայն հանձնաժողովի նախագահի տեղակալի ընտրության վերաբերյալ օրակարգային հարցի քննարկմանը նրանք որոշեցին չմասնակցել ու լքեցին նիստերի դահլիճը:
Հանձնաժողովի նախագահ Անդրանիկ Քոչարյանը նշեց, որ պատրաստակամություն էր հայտնել նիստից հետո աշխատանքային փակ քննարկում կազմակերպել:
«Սեյրան Օհանյանը դիմել է ԱԺ պաշտպանության և անվտանգության հանձնաժողովի նախագահին՝ ինձ, և արտաքին հարաբերությունների հանձնաժողովի նախագահ Էդուարդ Աղաջանյանին՝ քննարկումներ կազմակերպելու: Իրենց հանձնաժողովից այս հարցի քննարկման համար նշանակել են Գեղամ Մանուկյանին: Բայց իրենք չսպասեցին նիստի ավարտին: Կարծում եմ, որ նրանց ընդամենը հայտարարություն էր պետք, որովհետև հակառակ պարագայում իրենք պետք է մնային, որ նիստն ավարտելուց հետո քննարկեինք Սեյրան Օհանյանի առաջարկը»,-ասաց Անդրանիկ Քոչարյանը:
Նա նշեց, որ քննարկումը կլինի միայն ընդդիմադիր խմբակցության անդամների ներկայության դեպքում:
