Գործողությունների համատեղ համապարփակ ծրագրի վերականգնման շուրջ Վիեննայում ընթացող բանակցությունները մի քանի օրով կդադարեցվեն, հայտնել է իրանական IRNA գործակալությունը։
Մասնակիցներն Ավստրիայի մայրաքաղաքում քննարկումները կավարտեն դեկտեմբերի 30-ին և բանակցությունների սեղանի շուրջ կվերադառնան 2022 թ. հունվարի 3-ին:
Դեկտեմբերի 27-ին Վիեննայում սկսվել է իրանական միջուկային գործարքի շուրջ ապրիլին մեկնարկած բանակցության 8-րդ փուլը: Նիստից հետո Իրանի փոխարտգործնախարար Ալի Բաղերին ընդգծել է, որ հաջողության բանալին Իրանի դեմ պատժամիջոցների վերացման հարցում համաձայնության հասնելն է: Նա նշել է, որ այսօր կքննարկվեն պատժամիջոցների չեղարկման և երաշխիքների վերաբերյալ Իրանի առաջարկները:
«Եթե առաջիկա օրերին և շաբաթներին քրտնաջան աշխատենք, դրական արդյունքի կհասնենք։ Շատ դժվար կլինի։ Բարդ քաղաքական որոշումներ պետք է կայացվեն ինչպես Թեհրանում, այնպես էլ Վաշինգտոնում»,- ասել է Եվրամիության գլխավոր բանակցող Էնրիկե Մորան՝ հանդիպման մեկնարկին հաջորդած մամուլի ասուլիսում։
