Քրդամետ «Ժողովուրդների դեմոկրատական» կուսակցությունից (ԺԴԿ) ընտրված հայ պատգամավոր Կարո Փայլանը Թուրքիայի խորհրդարանում խոսել է այդ երկրում տիրող ազգայնականության, խտրականության, հարևանների նկատմամբ եղած թշնամանքի մասին, գրում է Ermenihaber-ը:
Նա հիշեցրել է, որ մինչև թուրքերի տարածաշրջանում հայտնվելը, այնտեղ տարբեր ազգեր են միասին ապրել, քաղաքակրթություն հիմնել և հնարավոր չէ Թուրքիայի պատմությունը շարադրել առանց հայերի, հույների ու քրդերի:
Ապա դիմել է դահլիճում նստած արտգործնախարար Մևլութ Չավուշօղլուին՝ նշելով, որ տարիներ շարունակ նրան կոչ է անում ամբիոնից ժողովրդին դիմելիս ազգակիցներ բառի փոխարեն օգտագործի հայրենակիցներ/քաղաքացիներ բառը:
«Ձեր աթոռին 110 տարի առաջ հայ էր նստած, ես էլ տեսականորեն կարող եմ նստել ձեր աթոռին: Ձեզ դուր կգա՞, որ ես վեր կենամ ասեմ՝ ազգակիցներիս համար այս կամ այն բանն եմ անում: Դուր չի գա: Այս երկիրը ոչ թե ազգակիցներ, այլ քաղաքացիներ ունի»,- ասել է Փայլանը թուրք նախարարին:
