Ավելի քան հարյուր մարդ է հեռացել Աֆղանստանի մայրաքաղաք Քաբուլի օդանավակայանից առաջին առևտրային թռիչքով՝ ամերիկյան զորքերի դուրսբերումից հետո: Qatar Airways ավիաընկերության չարտերային չվերթը հինգշաբթի վայրէջք է կատարել Կատարի մայրաքաղաք Դոհայում, իսկ երկրորդը նախատեսվում է իրականացնել ուրբաթ՝ հայտնում է BBC-ն:
Քաբուլի օդանավակայանը փակ էր ավելի քան մեկ շաբաթ՝ օգոստոսի 31-ի գիշերից, երբ ԱՄՆ-ը և նրա դաշնակիցները ավարտեցին արևմտյան պետությունների քաղաքացիների և նրանց հետ աշխատած աֆղանստանցիների զանգվածային տարհանումը:
Ինքնաթիռում եղել է Բրիտանիայի 13, Կանադայի՝ 43, Հոլանդիայի՝ 13 քաղաքացի, ԱՄՆ քաղաքացիների թիվը չի նշվում:
Ավելի վաղ հաղորդվել էր, որ Աֆղանստանում ամերիկյան զորքերի դուրսբերումից հետո այնտեղ դեռ հարյուր ամերիկացի կա:
Ըստ տեղեկությունների՝ օգոստոսի վերջին երկու շաբաթվա ընթացքում՝ թալիբների կողմից Քաբուլի գրավումից հետո, Միացյալ Նահանգներն ու արևմտյան այլ երկրներ Աֆղանստանից հեռացրել են ավելի քան 124,000 օտարերկրացի և աֆղանստանցի, որոնք վախենում էին թալիբների վրեժից:
Վաշինգտոնն ու Լոնդոնը շնորհակալություն են հայտնել Կատարին թռիչքն իրականացնելու համար: Կատարը վերջին տարիներին միջնորդ է եղել թալիբների և միջազգային հանրության միջև: Շատ երկրներ, այդ թվում՝ ԱՄՆ-ը, «Թալիբանի» իշխանության գալուց հետո իրենց դեսպանատները Քաբուլից տեղափոխեցին Դոհա:
