Օգոստոսի 31-ին Մոսկվայում կկայանա Ռուսաստանի արտաքին գործերի նախարար Սերգեյ Լավրովի և Հայաստանի ԱԳ նախարար Արարատ Միրզոյանի հանդիպումը:
Ըստ ՌԴ ԱԳՆ հաղորդագրության՝ նախարարները կքննարկեն բոլոր ոլորտներում հայ-ռուսական դաշնակցային հարաբերությունների խորացման հարցերը, գործակցության խորացումն ընդհանուր ինտեգրացիոն միություններում՝ ԱՊՀ-ում, ՀԱՊԿ-ում և ԵԱՏՄ-ում, նաև դիրքավորումը ՄԱԿ-ում, ԵԱՀԿ-ում և այլ միջազգային կազմակերպություններում:
Հանդիպման ընթացքում անդրադարձ կկատարվի նաև Ռուսաստանի, Հայաստանի և Ադրբեջանի նախագահների՝ 2020 թ. նոյեմբերի 9-ի և 2021 թ. հունվարի 11-ի Լեռնային Ղարաբաղի վերաբերյալ հայտարարությունների իրականացման քայլերին, այդ թվում՝ հումանիտար և Հարավային Կովկասում տնտեսական և տրանսպորտային կապերի ապաշրջափակման հարցերին:
Ռուսաստանի արտաքին գերատեսչությունն ակնկալում է, որ Մոսկվայում առաջիկա բանակցությունները կնպաստեն Երևանի հետ դաշնակցային գործակցության խորացմանը, տարածաշրջանում անվտանգության և կայունության ամրապնդմանը:
