Մակրոնը և Ալիևը կարևորել են ԵԱՀԿ ՄԽ համանախագահների ջանքերը տարածաշրջանային կայունության ապահովման հարցում
Ֆրանսիայի նախագահ Էմանուել Մակրոնը և Ադրբեջանի նախագահ Իլհամ Ալիևը պայմանավորվել են համագործակցել՝ ի շահ տարածաշրջանային կայունության: Այս մասին նշված է երկու գործիչների հեռախոսազրույցների արդյունքների վերաբերյալ Ելիսեյան պալատի տարածած հաղորդագրությունում:
«Ադրբեջանի և Ֆրանսիայի նախագահներ Իլհամ Ալիևը և Էմանուել Մակրոնը պայմանավորվել են համագործակցել հանուն տարածաշրջանում կայունության ամրապնդման՝ հիմնվելով ԵԱՀԿ Մինսկի խմբի համանախագահների (Ռուսաստան, Ֆրանսիա, ԱՄՆ) աջակցության վրա»,- նշված է ֆրանսիական կողմի տարածած հաղորդագրությունում:
Զրույցի ժամանակ Է. Մակրոնն անհանգստություն է հայտնել Հայաստանի և Ադրբեջանի միջև հարաբերություններում լարվածության վերաբերյալ: Նախագահները քննարկել են իրավիճակը տարածաշրջանում և եռակողմ համաձայնության շուրջ առկա բարդությունները, որոնք անհրաժեշտ է հաղթահարել:
Ֆրանսիայի և Ադրբեջանի ղեկավարները կարևորել են ԵԱՀԿ ՄԽ համանախագահների ջանքերը տարածաշրջանային կայունության ապահովման հարցում:
Ավելի վաղ Ֆրանսիայի արտգործնախարար Ժան-Իվ Լը Դրիանը հաստատել է Փարիզի հանձնառությունը՝ հասնելու Հայաստանի և Ադրբեջանի միջև լիարժեք ապաէսկալացիայի:
