ՀՀ ՄԻՊ-ը Նիկոլ Փաշինյանին գրած նամակում բարձրացրել է ՄԻԵԴ միջպետական հրատապ գանգատ ներկայացնելու հարցը
ՀՀ մարդու իրավունքների պաշտպան Արման Թաթոյանը Ֆեյսբուքի իր էջում տեղեկացրել է, որ ՀՀ վարչապետի պաշտոնակատար Նիկոլ Փաշինյանին այսօր նամակ է հղել և բարձրացրել Եվրոպական դատարան միջպետական հրատապ գանգատ ներկայացնելու հարցը՝ կապված Ադրբեջանի զինված ուժերին ՀՀ գյուղերի հարևանությունից և համայնքների միջև ճանապարհներից անհապաղ հեռացնելու և անվտանգության գոտի ստեղծելու հետ:
«Նամակում նշել եմ, որ Մարդու իրավունքների պաշտպանը Կառավարությանը կտրամադրի հավաքված ապացույցները, որոնք հաստատում են Եվրոպական կոնվենցիայի խախտումները, և հիմնավորում անվտանգության գոտու հրատապ անհրաժեշտությունը:
Մասնավորապես, արդեն նախորդ մի քանի հայտարարությամբ նշել եմ, որ ադրբեջանական զինված ծառայողների ներկայությունը ՀՀ Գեղարքունիքի և Սյունիքի գյուղերի հարևանությամբ և Սյունիքի համայնքների միջև ճանապարհներին, նրանց արարքները խախտում են ՀՀ բնակիչների՝ Մարդու իրավունքների եվրոպական կոնվենցիայով երաշխավորված առնվազն հետևյալ իրավունքները.
1) կյանքի իրավունք. Կոնվենցիայի 2-րդ հոդված.
2) ազատության և անձնական անձեռնմխելիության իրավունք. Կոնվենցիայի 5-րդ հոդված.
3) մասնավոր և ընտանեկան կյանքը հարգելու իրավունք. Կոնվենցիայի 8-րդ հոդված.
4) սեփականության իրավունք. 1-ին արձանագրության 1-ին հոդված.
5) տեղաշարժի ազատություն. 4-րդ արձանագրության 2-րդ հոդված և այլն:
Նույնը վերաբերում է նաև ադրբեջանական դրոշներին ու ցուցանակներին, նրանց զինված ուժերի ցանկացած տեխնիկայի»,- գրել է ՀՀ ՄԻՊ-ը:
