Խորհրդարանը հունիսի 3-ի արտահերթ նիստում առաջին ընթերցմամբ քննարկեց ««Տեխնիկական անվտանգության ապահովման պետական կարգավորման մասին» օրենքում փոփոխություններ և լրացումներ կատարելու մասին» օրենքի նախագիծը՝ կից փաթեթով: ՀՀ էկոնոմիկայի փոխնախարար Ավագ Ավանեսյանը հայտնեց, որ առաջարկվում է կարգավորել հրավառությունների կազմակերպումը՝ հաշվի առնելով ԵԱՏՄ տեխնիկական կանոնակարգով սահմանված դասակարգիչները, ինչն ընդունել է նաև Հայաստանը: Առաջարկվում է սահմանել հրատեխնիկական արտադրանքի դասերը՝ հաշվի առնելով դրանց վտանգավորության աստիճանները: Փոխնախարարի խոսքով՝ 2019-ին մեր երկիր է ներմուծվել մոտ 1 մլն 100 հազար դոլարի հրատեխնիկական արտադրանք:
Նախագծով սահմանվում է, թե երբ և օրվա որ ժամերին հնարավոր կլինի կազմակերպել հրավառություններ, և որ տարիքի անձանց կթույլատրվի գնել հրատեխնիկական արտադրանք: Մասնավորապես, առաջարկվում է արգելել դրանց վաճառքը բնակելի շենքերի տարածքներում: Առաջարկվում է արգելել նաև այն պայթուցիկ նյութերի վաճառքը, որոնց առաջացրած ձայնային աղմուկը 250 մետր հեռավորության վրա գերազանցում է 60 դեցիբելը:
Պատգամավորների մի մասն առաջարկեց բարելավել գործող համակարգը, ոչ թե փոփոխություններ առաջարկել օրենքում, ինչին ի պատասխան Ավագ Ավանեսյանն ասաց, որ առաջարկվող կարգավորումներն առավել ընդունելի են Կառավարության համար՝ հաշվի առնելով, որ համակարգի բարելավման դեպքում կարիք կլինի ներդնելու առավել մեծ ռեսուսներ:
Պատգամավոր Արուսյակ Ջուլհակյանը հետաքրքրվեց, թե կա՞ն արդյունավետ վերահսկողական մեխանիզմներ, որոնցով հնարավոր կլինի պարզել՝ քանի դեցիբել է հրավառությունից առաջացած աղմուկը: Ավագ Ավանեսյանը պարզաբանեց, որ խնդիրը կառավարելի է, կան մեխանիզմներ, որոնց շնորհիվ հնարավոր կլինի պարզել աղմուկի չափը: Նրա խոսքով՝ նման ուժգնության հրատեխնիկական արտադրանք մեր երկրում չի արտադրվում. դրանք ներմուծվում են:
ԱԺ տնտեսական հարցերի մշտական հանձնաժողովի նախագահ Բաբկեն Թունյանը հայտնեց, որ հանձնաժողովը փաթեթին բացասական եզրակացություն է տվել, քանի որ համոզիչ չեն եղել Կառավարության փաստարկներն առ այն, թե փաթեթով հնարավոր կլինի լուծել առկա խնդիրները: Նա առաջարկեց բարձրացնել քաղաքացիների անդորրը գիշերային ժամերին հրավառություններով խանգարողների համար սահմանված տուգանքը: «Օրինակ՝ 100 հազարը կարելի է դարձնել 1 կամ 2 մլն դրամ և կարգավորել հարցը»,- ասաց հանձնաժողովի նախագահը:
Փոխնախարար Ավագ Ավանեսյանը եզրափակիչ ելույթում խորհրդարանին հորդորեց ընդունել նախագիծը՝ այն համարելով խնդրի լուծման արդյունավետ տարբերակ:
