ԱԺ-ն առաջին ընթերցմամբ ընդունեց ԱԺ պատգամավոր Ալեն Սիմոնյանի ներկայացրած ՀՀ քաղաքացիական օրենսգրքում փոփոխությունների նախագիծը: Կողմ քվեարկեց 72, դեմ 30, ձեռնպահ 2 պատգամավոր:
Նախագծով առաջարկվում է վիրավորանքի համար մինչև 1 մլն փոխհատուցման չափի փոխարեն սահմանել մինչև 5 մլն դրամ, իսկ զրպարտության համար՝ մինչև 2 մլն փոխարեն մինչև 10 մլն դրամ փոխհատուցման չափ:
ԱԺ «Բարգավաճ Հայաստան» խմբակցության մի քանի պատգամավորների ներկայացրած ՀՀ քրեական օրենսգրքում փոփոխությունների նախագիծն առաջին ընթերցմամբ ընդունվեց 109 կողմ, 1 դեմ, 2 ձեռնպահ ձայներով:
Օրինագծով առաջարկվում է խստացնել պետական դավաճանության և լրտեսության համար պատժաչափերը՝ դավաճանության համար՝ մինչև ցմահ, լրտեսության համար՝ 15-20 տարի ազատազրկում:
Խորհրդարանն առաջին ընթերցմամբ ընդունեց ԱԺ պատգամավորներ Արտակ Մանուկյանի և Բաբկեն Թունյանի ներկայացրած «Բանկային ավանդների ներգրավման մասին» օրենքում փոփոխությունների նախագծերի փաթեթը՝ կողմ 93, դեմ 1, ձեռնպահ 19 ձայներով:
ԱԺ-ն առաջին ընթերցմամբ ընդունեց նաև «Հանրագրերի մասին»,«Առևտրի և ծառայությունների մասին», «Էլեկտրոնային հաղորդակցության մասին» և «Հրապարակային սակարկությունների մասին» օրենքներում փոփոխությունների նախագծերը: Երկրորդ ընթերցմամբ և ամբողջությամբ ընդունվեց «Հանրային խորհրդի մասին» օրենքում փոփոխություների նախագիծը:
ԱԺ-ն քվեարկությամբ մերժեց Կառավարության ներկայացրած «Մարդու իմունային անբավարարության վիրուսից առաջացած հիվանդության կանխարգելման մասին» օրենքում փոփոխությունների նախագիծը: Կողմ քվեարկեց 45, դեմ՝ 46, ձեռնպահ 10 պատգամավոր:
Նախագիծը պայմանավորված է ՄԻԱՎ վարակով ապրող անձանց իրավունքները պաշտպանելու, առկա օրենսդրական բացերը լրացնելու և ոլորտը, կարգավորող օրենսդրությունը ՁԻԱՀ-ի դեմ պայքարի միջազգային նոր մոտեցումներին համապատասխանեցնելու, ՄԻԱՎ-ի կանխարգելման և բուժման ծառայությունների առավելագույն հասանելություն ապահովելու և այդպիսով ՄԻԱՎ- ՁԻԱՀ-ի հակազդման ոլորտում առկա մարտահրավերներին էլ ավելի արդյունավետ արձագանքելու անհրաժեշտությամբ:
