Այսօր 85 տարեկանում կյանքից հեռացել է Հակոբ Պարոնյանի անվան երաժշտական կոմեդիայի պետական թատրոնի դերասան, ՀԽՍՀ վաստակավոր արտիստ Ժակ Ենգիբարյանը՝ տեղեկանում ենք թատրոնի Ֆեյսբուքի էջից:
Ժակ Ենգիբարյանը ծնվել է 1936 թվականին Լենինգրադում։ Մի քանի ամիս անց ընտանիքը տեղափոխվել է Երևան։ 1953 թվականին ավարտել է Երևանի Ձերժինսկու անվան միջնակարգ դպրոցը: 1953-1958 թվականներին սովորել է Մոսկվայի պետական գեղարվեստաթատերական ինստիտուտի ռեժիսուրայի ֆակուլտետում։ 1958-1962 թվականներին եղել է Վիլնյուսի ռուսական դրամատիկ թատրոնի դերասան, մինչև 1977 թվականը որպես դերասան աշխատել է Խորհրդային Միության տարբեր քաղաքներում՝ Պետրոզավոդսկ, Օմսկ, Բաքու, Թբիլիսի: 1977 թվականից աշխատել է Երևանի Ստանիսլավսկու անվան ռուսական դրամատիկական թատրոնում, 1993 թվականից՝ Երևանի Հակոբ Պարոնյանի անվան երաժշտական կոմեդիայի թատրոնում։
Ժակ Ենգիբարյանի խաղացած ներկայացումները.
- Ագամեմնոն՝ «Հերակլեսի սխրանքները»
- Անժելո՝ «Անժելո»
- Արթուր՝ Էթել Լիլիան Վոյնիչի «Բոռը»
- Դ՚Արտանյան՝ Ալեքսանդր Դյումայի «Դ՚Արտանյանը և երեք հրացանակիրները»
- Սեյրան՝ Ալեքսանդր Շիրվանզադեի «Նամուս»
- Մերուժան Արծրունի՝ Պերճ Զեյթունցյանի «Արշակ թագավոր»
- Օսեփ՝ Գաբրիել Սունդուկյանի «Քանդած օջախ»
- Աբդուլլահ փաշա՝ Սերո Խանզադյանի «Մխիթար Սպարապետ»
- Ցիլինդր՝ Է. դե Ֆիլիպպոյի «Ցիլինդր»
- Ֆերեկիս՝ Դ. Պսաֆասի «Պահանջվում է ստախոս»
- Մալվոլիո՝ Վիլյամ Շեքսպիրի «Տասներկուերորդ գիշեր»
Ֆիլմերը.
- «Քայլեր մշուշում», 1959 թ.
