Թուրքիայի պաշտպանության նախարար Հուլուսի Աքարը նախազգուշացրել է, որ եթե Լիբիայի ազգային բանակը, մարշալ Խալիֆա Հաֆթարի գլխավորությամբ, փորձի հարձակվել տարածաշրջանում գտնվող թուրքական ուժերի վրա, կստանա համարժեք պատասխան: Այս մասին տեղեկացնում է INTERFAX-ը:
Աքարն այդ հայտարարությունն արել է Լիբիայում թուրք զինվորականների առաջ ունեցած ելույթի ժամանակ: Թուրքիան աջակցում է ՄԱԿ-ի ճանաչած Ազգային համաձայնության կառավարությանը, որն իրականացնում է Տրիպոլիի հսկողությունը:
Հուլուսի Աքարի հայտարարությունը դիտվում է՝ որպես պատասխան Հաֆթարի հայտարարությանը, որում մարշալն իր ենթականերին կոչ էր արել Լիբիան ազատել թուրքական ռազմական ներկայությունից:
Լիբիայում երկար ժամանակ զուգահեռ գործում է երկու կառավարություն՝ Ֆայեզ Սարաջի ազգային համաձայնության կառավարությունը Տրիպոլիում և Աբդուլլահ Աբդուռահման աթ-Թանիի ժամանակավոր կաբինետը երկրի արևելքում, որին աջակցում է Լիբիայի ազգային բանակը:
