«Լուսավոր Հայաստան» խմբակցության ղեկավար Էդմոն Մարուքյանը Ֆեյսբուքի ուղիղ միացմամբ ներկայացրեց իրավիճակի վերաբերյալ առաջարկած գործողությունների մանրամասները: Ասաց, որ «Լուսավոր Հայաստան» կուսակցության հրապարակած ճանապարհային քարտեզի առաջին կետը վերաբերում է նրան, որ վարչապետը պետք է հեռանա, նաև հեռացման մեխանիզմներն են նշել: Մարուքյանը շեշտեց, որ երկրորդ կետը վերաբերում է հայ-ռուսական հարաբերությունների բարձր որակի ապահովմանը: Երրորդ կետն առնչվում է ՀՀ-ի Ադրբեջանի և Ռուսատանի միջև ստորագրված հայտարարության անորոշ դրույթների շուրջ բանակցությունների նախաձեռնմանը ՝ հայանպաստ լուծումների հասնելու նպատակով, Արցախի ինքնորոշման իրավունքի վերջնական ամրագրման և կենսագործման երկարաժամկետ կայունության և խաղաղության, հայկական շահն արտահայտող հավասարակշռված համաձայնագիր ունենալու նպատակով: Նախատեսում են Մինսկի խմբի համանախագահների ձևաչափով բանակցությունների ընթացքի վերականգնում:
Անդրադառնալով ստորագրված եռակողմ հայտարարությանը՝ Մարուքյանը նշեց, որ վերջնաժամկետներ ունենք, թե երբ պետք է լքենք, օրինակ, Քարվաճառը, բայց չունենք վերջնաժամկետ, թե երբ պետք է մեր ռազմագերիները և գերի ընկած քաղաքացիական անձինք փոխանակվեն և վերադարձվեն: Ասաց՝ դա բանակցության առարկա է:
Մարուքյանը ներկայացրեց, որ ճանապարհային քարտեզի կետերից է Հայաստան-Արցախ-Սփյուռք ներուժի համախմբումը, ներքին իրավիճակի կայունացում, բախումների դադարեցումը, հանրային համերաշխության վերականգնումը, պառակտող գործողությունների, բռնության կոչերի, ատելության խոսքի բացառումը: Դրույթներից է պետական ինստիտուտների վերականգնումը, ամրապնդումը, իրավապահ մարմինների աշխատանքի խիստ համակարգումը, երկրում կարգ ու կանոնի ամրապնդում հանրային անվտագության վերականգնման ապահովման նպատակով:
«Յոթերորդ կետով՝ զոհված և վիրավորված զինծառայողների ու նրանց ընտանիքների կարիքների պատշաճ ապահովում, ինչպես նաև գերի ընկած կամ ռազմագերի դարձած մեր քաղաքացիների ընտանիքների սոցիալական և այլ հոգեբանական ապահովում»,- ասաց Մարուքյանը՝ նշելով, որ ութերորդ կետով էլ նախատեսում են արցախահայության, այդ թվում՝ փախստականների սոցիալական կարիքների անհապաղ լուծում և կենսագործունեության պայմանների վերականգնում Արցախում:
Ճանապարհային քարտեզի կետերը ներկայացնելիս Մարուքյանը նշեց, որ երկիրը գտնվում է կորոնավիրուսի ճգնաժամի մեջ, և այդ կետերից մեկն էլ կորոնավիրուսի դեմ պայքարի արդյուանվետ համակարգումն է: Մարուքյանի խոսքով՝ ըստ ճանապարհային քարտեզի՝ առաջարկվում է նաև միջազգային դոնորների համաժողովի հրավիրում: 11-րդ կետով նշել են՝ հայկական դիվանագիտության թիմի աշխատանքների հիմնարար փոփոխություն, արտաքին քաղաքականության վերաիմաստավորում, նախաձեռնողական քաղաքականության վարում դաշնակից և այլ պետությունների հետ: Հայաստանի խախտված իրավունքների պաշտպանության նախաձեռնում միջազգային դատական ատյաններում: 12-րդ կետով՝ տնտեսությունն ու բանակը վերականգնելու ազգային հեռանկարային ծրագրի մշակում, կայուն զարգացման ապահովում, իսկ 13-րդ կետով՝ ազատ, արդար, թափանցիկ հավասար պայմանների ապահովմամբ արտահերթ խորհրդարանական ընտրությունների անցկացում։
