ԱՀ առողջապահության նախարարությունից տեղեկացնում են, որ շարժական ռենտգեն սարքավորումը՝ Jade թվային AcquiDR ռադիոգրաֆիկ համակարգով, հանդիսանում է լավագույն լուծում ռենտգենոգրաֆիաներ իրականացնելու համար բժշկական կենտրոնի ցանկացած բաժանմունքում։
Այն կարող է կիրառվել ռեանիմացիոն բաժանմունքում, ընդունարանում և նույնիսկ անմիջապես պալատում՝ տեղաշարժվելու խնդիրներ ունեցող պացիենտներին հետազոտելու համար։
Համակարգը հագեցած է թվային անլար հարթ պանելային դետեկտորով, ինչի շնորհիվ պատկերները ստացվում են աշխատանքային կայանի մոնիթորին` վայրկյանների ընթացքում։
Վերամշակման հատուկ փաթեթի շնորհիվ այս համակարգով կարելի է ստանալ բարձրորակ պատկերներ 10-20 անգամ ավելի ցածր ճառագայթման դոզայով, քան սովորական ռենտգեն համալիրներով:
Հաշվի առնելով ներկա համաճարակային իրավիճակը՝ այն շատ կարևոր է պացիենտների հոսքը արագ կառավարելու համար։ Ցանկության դեպքում՝ սարքավորումը կարելի է տեղափոխել համապատասխան մեքենայով այլ վայր և կատարել թվային ռենտգենոգրաֆիկ հետազոտություններ։
Ռենտգեն սարքերը տրամադրվել են Շուշիի, Մարտակերտի, Հադրութի և Մարտունու շրջանային բուժմիավորումներին՝ տեղեկացնում են ԱՀ առողջապահության նախարարությունից։
